Bul mekemelerge qiyn ómirlik jaǵdaiǵa tap bolǵan adamdar habarlasa alady jáne statsionar, jartylai statsionar, úide kútim jasaý nemese ýaqytsha kómek ala alady. Olardyń jumys barysy týraly onlain brifingte qalalyq Jumyspen qamtý jáne áleýmettik qorǵaý basqarmasynyń basshysy Ilia Skýb aityp berdi, dep habarlaidy Nur-Sultan ákimdiginiń resmi saity.
Qalanyń Jumyspen qamtý jáne áleýmettik qorǵaý basqarmasy vedomstvolyq baǵynystaǵy 10 mekemeniń qyzmetin úilestiredi, olardyń 6-aýy ómirlik qiyn jaǵdaiǵa tap bolǵan adamdarǵa statsionar, jartylai statsionar, úide kútim jasaý jáne ýaqytsha bolý jaǵdailarynda arnaýly áleýmettik qyzmetter kórsetedi.
Bul ortalyqtardyń qyzmetter tiziminde – áleýmettik-turmystyq, meditsinalyq, psihologiialyq, pedagogikalyq, eńbek, mádeni, ekonomikalyq jáne áleýmettik-quqyqtyq kómek bar.
«Arnaiy áleýmettik qyzmettermen aǵymdaǵy kezeńde 3464 adam qamtyldy, onyń ishinde memlekettik mekemeler – 2268 adam, úkimettik emes uiymdar – 1196 adam», – dedi Ilia Skýb.
Qalada «Sharapat» áleýmettik qyzmet kórsetý ortalyǵy jumys isteidi, ol múgedektigi bar adamdar men zeinetkerlik jasqa jetken, óz betinshe júrip-tura almaityn jáne densaýlyǵyna bailanysty áleýmettik qyzmet alýǵa muqtaj qart adamdardyń statsionar jaǵdaiynda táýlik boiy turaqty nemese ýaqytsha turýyna arnalǵan. Sondai-aq úide múmkindigi shekteýli adamdarǵa jáne ózine-ózi qyzmet kórsetý qabiletin ishinara joǵaltqan qart azamattarǵa kómek kórsetiledi. Ortalyqtyń qamqorlyǵynda 782 adam bar, onyń 300-i statsionarda, qalǵanyna úiinde qyzmet kórsetiledi. Ortalyqtyń jumysyn 286 qyzmetker qamtamasyz etedi.
«Nurly júrek» áleýmettik qyzmet kórsetý ortalyǵy psihonevrologiialyq patologiiasy bar 3 jastan 18 jasqa deiingi múgedek balalardyń táýlik boiy turaqty nemese ýaqytsha turýyna arnalǵan. Búginde qamqorlyqqa alynǵandardyń sany 252 balany quraidy, olardyń 111-i statsionar jaǵdaiynda, 141-i jartylai statsionar jaǵdaiynda qyzmet alady.
Nur-Sultan qalasy ákimdiginiń «Qamqor» áleýmettik qyzmet kórsetý ortalyǵy» statsionar jaǵdaiynda arnaýly áleýmettik qyzmet kórsetýge muqtaj, psihonevrologiialyq aýrýlary bar birinshi, ekinshi toptardaǵy 18 jastan asqan adamdardyń táýlik boiy turaqty nemese ýaqytsha turýyna arnalǵan. Qamqorlyqqa alynýshylar sany 370 adamdy quraidy, onyń ishinde 1-toptaǵy múgedektigi barlar – 75 adam, ekinshi toptaǵy múgedekter – 295 adam», - dep túsindirdi spiker.
Sondai-aq elordada qiyn jaǵdaiǵa tap bolǵan adamdardy qaita áleýmettendirý ortalyǵy da jumys isteidi. Munda ýaqytsha (bir jylǵa deiin) táýlik boiy nemese tek túngi ýaqytta belgili bir turǵylyqty jeri joq adamdar, sondai-aq bas bostandyǵynan aiyrý oryndarynan bosatylǵan nemese probatsiia qyzmetinde esepte turǵan adamdar bola alady. Biyl ortalyq 235 adamdy qabyldady, onyń 87-i – kúndizgi bólimge, 148-i – túngi bólimge.
Turmystyq zorlyq-zombylyq qurbandarymen qalada «Úmit» daǵdarys ortalyǵy jumys isteidi. Munda olar jarty jylǵa deiin táýlik boiy bola alady. Qazir statsionar jaǵdaiynda 69 adam turady: 19 áiel jáne 50 bala.
«Jansaia» áleýmettik qyzmet kórsetý ortalyǵyna turǵylyqty jeri boiynsha úide arnaýly áleýmettik qyzmet alý úshin múgedektigi bar balalar men psihonevrologiialyq patologiiasy bar muqtaj adamdar júgine alady. Qyzmettermen 560 adam qamtyldy.
«Qarttarǵa, múgedek adamdarǵa jáne múgedek balalarǵa arnalǵan ońaltý ortalyǵy sanatorii-kýrorttyq emdeý jáne ońaltý qyzmetterin kórsetý úshin arnalǵan. Qamqorlyqtaǵy 815 adam, zeinetkerler – 756, UOS qatysýshylary, múgedekteri jáne jeńildikter boiynsha olarǵa teńestirilgen adamdar – 57, qýǵyn-súrginge ushyraǵandar – 2. Sonymen qatar, qalada belsendi uzaq ómir súrý ortalyǵy jumys isteidi, ol 2 662 zeinetkerge qyzmet kórsetedi. 2021 jyldyń qarasha aiynan bastap Ortalyq kommýnaldyq memlekettik mekeme mártebesin aldy», - dedi Ilia Skýb.
