30 000-nan asa qazaqstandyq pen elorda qonaqtary Leonardo da Vinchidiń "Ádemi hanshaiym" - La Bella Principessa kórmesin tamashalady. Italiianyń Qazaqstandaǵy elshiliginiń, ForteBank, Mastercard, Scripta Maneant, Italiianyń mádeniet institýty men QR Mádeniet jáne aqparat ministrliginiń kúsh-jigeriniń arqasynda ataqty italian sýretshisiniń shedevri Astanadaǵy QR Ulttyq mýzeiine qoiyldy.
Kórmeniń alǵashqy qonaǵy Qazaqstan Prezidenti Qasym-Jomart Toqaev boldy. Aqordanyń baspasóz qyzmeti málimetinshe, maýsymnyń basynda Memleket basshysy Ulttyq mýzeige baryp, otandyq jáne álemdik beineleý óneri týyndylarynyń kórmesin tamashalady. Sondai-aq, Prezidentke La Bella Principessa kartinasy kórsetildi. Kórmeniń ashylýy QR Ulttyq mýzeiiniń on jyldyq mereitoiymen jáne ieleriniń aitýynsha, 528 jasqa tolǵan kartinanyń týǵan kúnimen tuspa-tus keldi.
Astanada kórmeni ótkizý ideiasy Italiianyń Qazaqstandaǵy elshisi Marko Albertige tiesili. La Bella Principessa kórsetilimine daiyndyq barysy qiynǵa soqqan, ol alty aiǵa sozyldy, al da Vinchidiń kartinasyn saqtandyrý quny shamamen 200 million eýro turady.
La Bella Principessa - Leonardo da Vinchi XV ǵasyrdyń sońynda salǵan qyzdyń portreti, týyndy italian aqsúiegine tiesili. Da Vinchidiń bul jumysy búkil álem boiynsha bes ret qana kórsetildi.
Uiymdastyrýshylar kórme Da Vinchidiń kartinasyn Astanada kórsetý múmkindigi ǵana emes, sonymen qatar, Qazaqstan men Italiia arasyndaǵy mádeni bailanystardy damytýǵa jasalǵan qadam dep sanaidy.
Leonardo da Vinchidiń shedevrin tamashalaý aiaqtalýyna birneshe kún qaldy, ol 4 tamyzǵa deiin jalǵasady. Senbi jáne jeksenbi kúnderi QR Ulttyq murajaiy 10:00-den 18:00-ge deiin, kassa 17:00-ge deiin jumys isteidi.
