Astanada kámeletke tolmaǵan azamattan 20 million teńge bopsalaǵan tórt adamǵa sot úkimi shyqty, dep habarlaidy Dalanews.kz.
Tergeý nusqasy boiynsha, sottalǵandar jábirlenýshiniń shetelge oqýǵa ketetinin jáne onyń ata-anasynyń qarjylyq jaǵdaiyn bilgen soń, aldyn ala sóz bailasyp, odan 20 million teńge talap etken.
“Olar psihologiialyq qysym kórsetip, atys qarýyn kórsetip qorqytý arqyly 4 million teńge kólemindegi aqshany alǵan. Toptyń eki múshesi jábirlenýshiden kezekti 100 myń teńge alyp jatqanda ustaldy. Keiinirek qalǵandary da qolǵa tústi”, – delingen habarlamada.
Prokýrorlar aiyptalýshylardyń kinásin tolyq dáleldedi. Sot árqaisysyn 10 jylǵa bas bostandyǵynan aiyrdy. Jábirlenýshige keltirilgen materialdyq zalal tolyǵymen óteldi. Sonymen qatar sottalǵandardan jábirlenýshiniń paidasyna 2 million teńge kóleminde moraldyq ótemaqy óndirildi.
Sot úkimi zańdy kúshine endi.
