Astanada damý ereksheligi bar jasóspirimdi qatarlastary soqqyǵa jyqqan. Oqiǵa týraly zardap shekken balanyń anasy áleýmettik jelide jazdy, dep habarlaidy dalanews.kz.
Áieldiń aitýynsha, oqiǵa mekteptegi sabaqtan keiin bolǵan.
«Ulym synyptan shyqqan kezde oǵan artynan shabýyl jasady. Tunshyqtyryp, ura bastaǵan. Balama 15-ten astam soqqy jasaldy. Basqalary janynda turyp, eshkim kedergi jasamasyn dep ózgelerdi ustap turǵan. Meniń ulymda psihikalyq jáne sóileý damýynyń tejelýi bar. Ol ózine ne úshin bulai jasaǵanyn da tolyq túsinbedi», – dep jazdy anasy Instagram paraqshasynda.
Onyń sózinshe, oqiǵa kezinde ainalada basqa balalar da bolǵan.
«Balalar qarap turdy. Kúldi. Telefonǵa túsirip turǵan», – dedi ol.
Oqiǵaǵa qatysty Esil aýdandyq politsiia basqarmasy pikir bildirdi. Politsiia málimetinshe, shabýyl jasaǵan jasóspirimniń zańdy ókili bala tárbiesine qatysty mindetterin tiisinshe oryndamaǵany úshin jaýapkershilikke tartylǵan.
Sonymen qatar quqyq qorǵaý organdary mektep ákimshiligi jáne ata-analarmen birge quqyq buzýshylyqtyń aldyn alý boiynsha keńes ótkizgen.
Politsiia mundai jaǵdailardyń qaitalanbaýy úshin oqýshylardyń tártibine baqylaýdy kúsheitý máselesi qaralǵanyn habarlady.
