Qazaqstan men Rýmyniia kólik ministrlikteri Transkaspii halyqaralyq kólik marshrýtyn odan ári damytý boiynsha yntymaqtastyqqa jáne aviatsiialyq oqiǵalardy tergeý salasyndaǵy ózara túsinistik týraly memorandýmǵa qol qoiyldy, – dep habarlaidy Dalanews.kz.
Kólik ministri Marat Qarabaev Býharest qalasynda Rýmyniianyń kólik jáne infraqurylym ministrliginiń basshysymen kezdesý ótkizdi. Kezdesý barysynda Marat Qarabaev pen Sorin Grindianý kólik jáne logistika salasyndaǵy ekijaqty yntymaqtastyq máselesin talqylady. Atap aitqanda, Transkaspii halyqaralyq kólik marshrýty sheńberindegi jobalar talqylandy.
Qazaqstannyń kólik salasyna jaýapty ministri atalǵan Transkaspii halyqaralyq kólik marshrýtynyń róli kún sanap artyp kele jatqanynyn tilge tiek etip, Qara teńiz ben Eýropanyń basym bóliginiń arasynda ornalasqan Rýmyniia memleketiniń Orta dálizdiń áleýetin arttyrý barysyndaǵy mańyzdylyǵyn erekshe atap ótti.
– Biz tranzittik júk tasymaly kólemin ózara arttyrý ári mýltimodaldyq tasymaldar men logistikalyq úrdister salasynda tájiribe almasý maqsatynda yntymaqtastyǵymyzdy odan ári nyǵaitýǵa niettimiz. Qazaqstan men Rýmyniia halyqaralyq kólik dálizin damytý boiynsha halyqaralyq kelisimniń qatysýshylary ekenin eskeretin bolsaq, atalǵan dáliz boiyndaǵy yntymaqtastyqty odan ári arttyrýǵa qyzyǵýshylyq tanytyp otyrǵanymyz oryndy, – dedi Marat Qarabaev.
Sóz kezeginde ministr Qazaqstannyń jol infraqurylymyn damytý jáne Aziiadan Eýropaǵa barar jolda tranzittik temirjol jáne avtotasymaldardyń jyldamdyǵy men sapasyn arttyrý úshin qabyldaǵan sharalary týraly aityp berdi. Sonymen qatar ol Rýmyniia memleketindegi áýe kompaniialaryn «ashyq aspan» rejimi aiasynda Qazaqstanǵa reister jasaýǵa shaqyrdy.
Sodan keiin Marat Qarabaev pen Sorin Grindianý Qazaqstan kólik ministrligi men Rýmyniianyń kólik jáne infraqurylym ministrligi arasyndaǵy ózara túsinistik týraly Memorandýmǵa qol qoidy.
Sonymen birge QR Kólik ministrligi men Rýmyniianyń azamattyq aviatsiia qaýipsizdigin tergeý jáne taldaý basqarmasy (SIAA) aviatsiialyq oqiǵalar tergeý salasyndaǵy ózara túsinistik týraly Memorandýmǵa da qol qoidy. |Atalǵan qujat yntymaqtastyqty damytýǵa jáne keńeitýge ári ushý qaýipsizdiginiń deńgeiin arttyrý maqsatynda eýropalyq standarttar boiynsha qazaqstandyq mamandardyń biliktiligin arttyrý úshin múmkindik jasaýdy kózdeidi. .Kezdesý sońynda qazaqstandyq tarap Rýmyniianyń memlekettik jáne jeke sektorlarynyń óilderin biyl maýsym aiynda Astana qalasynda ótetin New Silk Way halyqaralyq kólik-logistikalyq forýmyna qatysýǵa shaqyrdy.
