Dese de, qazirgi geosaiasi jaǵdaidy esepke alsaq, mundai málimdemeler eki eldiń arasyna syzat túsiretini jasyryn emes. Qazaqstan biligi reseilik sarapshylardyń tarapynan aitylatyn aiyptaýlarǵa lezde jaýap qatyp, arandatýdyń aldyn-alýda.
Bul turǵyda Assambleianyń belsendiligi qandai? Assambleia sheteldik saiasatkerlerdiń arandatýyna qalai jaýap qatady? Uiym tóraǵasy Marat Ázilhanovtyń aitýynsha uiym qataryndaǵy mamandar mundai aiyptaýlardyń qaýesetke ulasyp ketpeýine birinshi kezekte mán beredi.
«Álgindei málimdemelerge jiti taldaý júrgizemiz. Jalpy kórshi elderdiń saiasi keńistikte júrgen tulǵalary aýyzdan shyqqan sózge abai bolǵany jón. Qazaqstan eshkimge soqtyqpai, beitarap jatqan el. Sondyqtan mundai aiyptaýlar shyndyqqa janaspaitynyn Assambleia músheleri de kórip bilip otyr.
Elimizdegi ultaralyq ahýaldy ýshyqtyrǵysy keletin aram piǵyldy, jat kózqarasty kontentti aýyzdyqtaý memlekettik deńgeide júrýi tiis. Sonymen birge, odaqtas elder retinde bizge Resei qoǵamynda pikir qalyptastyryp otyrǵan tulǵalarmen jii júzdesý kerek.
Olarǵa eldegi jaǵdaidan habar berip, Qazaqstanda eshbir etnos ókilderiniń qiynshylyqqa ushyramai, beibit ómir súrip jatqanyn kórsetýge tiispiz. Reseilik saiasatkerlerdiń kópshiligi Qazaqstandaǵy jaǵdaidan habarsyz. Shyn-ótirigi aralas aqparattan oqyǵan málimetti nazarǵa alyp, álgindei aiyptaýǵa jol berip qoiady. Sondyqtan dialogtan qashpaý qajet», – deidi Marat Ázilhanov.
...
Onyń atap ótkenindei búgingi tańda Assambleia jumysyn Jańa Qazaqstannyń talap-údesine beiimdeý mańyzdy másele. Prezident Toqaevtyń tóraǵalyǵymen ótken kúni keshegi Assambleia keńesinde Memleket basshysy tarapynan uiym jumysyn jetildirýge qatysty 37 tapsyrma berilgen.
«Assambleia músheleri Jańa Qazaqstannyń qabyrǵasyn qalaýǵa ázir. Iá, Tuńǵysh prezident irgesin qalaǵan ustanymdar qaz-qalpynda qalady, dese de Jańa Qazaqstan jańasha oilaýdy talap etedi. Sondyqtan da búgingi tańda Assambleianyń aqparattyq jumysyn myqtap qolǵa aldyq. Eń aldymen áleýmettik jelidegi jumysymyzdy júieleýdemiz. Jańa aqparattyq tehnologiialarǵa arqa súieýimiz kerek. Halyq uiymnyń atqaryp jatqan jumysynan únemi habar alyp otyrýǵa tiis», – deidi Assambleia tóraǵasynyń orynbasary.
...
Ázilhanovtyń aitýynsha Qańtar oqiǵasy Assambleia qataryndaǵy kásipkerlerge oi salǵan. Olar qarapaiym halyqqa burynǵydan beter qol ushyn sozýǵa ázir otyr.
Aita ketelik, buǵan deiin Assambleia múshesi, Qostanaidaǵy Káris etnomádeni ortalyǵynyń direktory, metsenat A.Kim kóp balaly Tólegenovtar otbasyna úi salýǵa qajetti qarjy bergen edi.
«Jalpy Assambleiamen etene jumys isteitin kásipkerler jaqsylyq jasaǵanyn jarnamalai bermeidi. Bul baǵytta uiym aýqymdy is atqardy.
Aitalyq, byltyrǵy jyly Assambleiaǵa múshe kásipkerlerdiń kómegimen 3400 qaiyrymdylyq aktsiiasy ótti. 16 myń otbasyǵa nemese 90 myńnan asa áleýmettik jaǵdaiy tómen azamatqa qoldaý kórsetildi.
Pandemiianyń órship turǵan shaǵynda Assambleia qataryndaǵy shaǵyn jáne orta biznes ókilderi 300 myń adamǵa kómek kórsetti. Kómektiń somasy 270 mln teńgeden asyp jyǵyldy. El basyna kún týǵanda Assambleia músheleri árdaiym kómekke kelýge ázir deidi», – deidi Ázilhanov.
