Assambleia músheleri Atambaevtyń áreketin synǵa aldy
Ikram Hashimjanov, Respýblikalyq «Dýstlik» ózbek etnomádeni birlestiginiń tóraǵasy:
– Jýyrda aǵaiyn sanalatyn kórshiles qyrǵyz eliniń basshysy A.Atambaevtyń bizdiń elimizge qarata aitqan málimdemesi atan túiege júk bolardai eken. Ejelden aýyly aralas, qoiy qaralas, tósekte basy, tóskeide maly qosylatyn kórshi el basshysynyń shýly málimdemesi «japtym jala, jaqtym kúieniń» kerin keltirip turǵandai. Óz basym kúlli Ortalyq Aziia elderindegi kóshbasshylyqqa ie bolyp otyrǵan Qazaqstannyń búgingi oń imidjine teris áser etýge tyrysýshylyq baiqaldy qyrǵyz basshysynyń áńgimesinde. Bul qazaq halqynyń «Aǵaiyn bar bolsa kóre almaidy, joq bolsa bere almaidy» degen sózine eske túsiredi. Qazaqstannyń, onyń Tuńǵysh Prezidenti – Elbasy N.Nazarbaevtyń álemdik arenadaǵy bedeli mundai syńarjaq pikirden tómendemesi anyq. Kóp konfessiialy, kóp etnosty Qazaqstannyń Máńgilik El bolýǵa baǵyt alǵan nyq qadamy kóńil qýantady. Elimiz aman, jurtymyz tynysh bolsyn!
Hasan Batsiev, OQO «Vainah» sheshen-ingýsh mádeni qoǵamdyq ortalyǵy tóraǵasynyń orynbasary:
– Ǵasyrlar boiy ózara senim men qoldaýdyń arqasynda eki el arasynda qalyptasqan dostyq pen baýyrlastyq qatynasqa Almazbek Atambaevtyń sailaýdyń býymen aitylǵan áńgimesine bola syzat túspeitinine senimdimin. Muny Premer-Ministr Baqytjan Saǵyntaevta óz málimdemesinde nyq aitqanyn bilemiz. Turaqty damýdyń qazaqstandyq modeli búginde búkil álemge úlgi. Biz turaqtylyqty baǵalai bilgenimizdiń arqasynda búgingi tabystarǵa jetip otyrmyz. Sondyqtan, qarym-qatynasymyzdyń úlken tarihy, bolashaǵy bar, ári qarai da eki el arasyndaǵy yntymaqtastyq dami beretinine senimdimin.
