Qazaqstannyń tuńǵysh prezidenti Nursultan Nazarbaevtyń úlken nemere kelini Aida Álieva jaqyn adamynyń densaýlyǵyna qatysty áserli jazba jariialady, dep dalanews.kz tilshisi Politico.kz saityna silteme jasap habarlaidy.
Dariǵa Nazarbaeva men Rahat Álievtiń uly Nuráliniń jubaiy qazirgi ýaqytta shetelde turatynyn aityp, naýqas ájesiniń janynda kún saiyn bola almaitynyn jetkizdi. Ol áleýmettik jelide ájesimen birge túsken sýretterin bólisip, qart kisige kútim jasap júrgen týystaryna alǵys aitty.
Aida Álievanyń sózinshe, onyń ájesi birneshe jyldan beri dementsiiamen aýyrady. Soǵan qaramastan, kei sátterde ol kisi erekshe sergip, anyq sóilei bastaitynyn jazdy.
"Ájemniń birneshe jyldan beri dementsiiasy asqynyp keledi. Kúndelikti ómirde ol kisi kóbine sóileskisi kelmeidi, tuiyqtalyp, uzaq ýaqyt únsiz qalýy múmkin. Biraq men "Aqmama, balalar men nemereler úshin video jazaiyqshy, sizdiń sózderińizdi saqtap qalý men úshin óte mańyzdy" desem, bir ǵajaiyp bolady. Ol kisi jinaqtalyp, jandanyp, sóilei bastaidy. Sondai anyq ári túsinikti sóileidi, kóp adam onyń dementsiiamen aýyratynyna senbeidi", – dep jazdy Aida Álieva.
Sonymen qatar ol ájesiniń janynda kún saiyn óziniń tátesi, iaǵni naýqastyń kelini bar ekenin atap ótti. Álieva muny úlkenderge degen shynaiy mahabbat pen qamqorlyqtyń úlgisi dep baǵalady.
Onyń aitýynsha, qart adamdarmen qarym-qatynasta eń mańyzdysy – nazar, meiirim jáne qasynda bolý. Tipti egde jastaǵy adam sóileskisi kelmese de, ony qushaqtap, qolynan ustap, janynda otyrýdyń ózi úlken qoldaý ekenin aitty.
"Iá, keide qart adamdarmen til tabysý ońai emes. Biraq biz kishkentai bolǵan kezde, bizben de árdaiym ońai bolǵan joq qoi", – dep jazdy ol.
Jazba sońynda Aida Álieva alǵys pen mahabbattyń tek sózben emes, naqty áreketpen kórinetinin eske saldy.
"Alǵys bir-birimizge bóletin ýaqytpen, kóńilmen, qamqorlyqpen jáne jai ǵana qasynda bolýmen ólshenedi", – dedi ol.
