29 maýsymnan bastap Forum SOSO-ǵa Ashyq qosymshasyn skanerlegennen keıin ǵana kirýge bolady. Kireberiste qaýipsizdik qyzmeti kelýshilerden júıede olardyń mártebesin tekserýdi suraıdy nemese ózderi tekseredi. Aıta ketsek, Almatyda bul júıe barlyq saýda núktelerine belsendi túrde engizilýde, osylaısha kásipkerler ınfeksıanyń taralýyna qarsy kúresti qoldaýda.
Forum SOSO zańgeriniń aıtýynsha, olar lokdaýndy engizbeý úshin Ashyq júıesimen jumys jasaýda.
– Bizdiń SOSO birinshi bolyp Ashyq aıasyndaǵy jumys algorıtmin qoldanýǵa qyzyǵýshylyǵyn pen daıyndyǵyn kórsetti. Bizdiń kásipkerler SOSO koronavırýstyq ınfeksıanyń taralý qaýpi joǵary adamdar kóp jınalatyn oryn ekenin túsinedi. Sondyqtan biz býtıkterimizdiń, fýdkorttar men basqa da saýda oryndarynyń qaýipsiz jumys isteýin qoldaımyz, – deıdi N. Stepanova.
Zańgerdiń aıtýynsha, Forum SOSO jańa mindetterge túsinistikpen qaraǵan kúzet qyzmetiniń jaýapty jumysynyń arqasynda Ashyq kóshbasshysy boldy.
Sonymen qatar, Forum SOSO-nyń 100 qyzmetkeriniń 95-i koronavırýsqa qarsy ekpe aldy. Saýda ortalyǵyndaǵy egý pýnkti 12 sáýirde ashyldy, sodan beri qala turǵyndary arasynda tanymal. SOSO-da vaksınalanǵandar arasynda birneshe ret baǵaly syılyqtar oınatyldy.
Atap ótsek, Almaty qalasy ákimdiginiń saıtynda Ashyq júıesiniń jaýapsyz qatysýshylarynyń da, 153 joba kóshbasshylarynyń tizimi de jarıalandy. Oń baǵalanǵandardyń arasynda – «Allúr avto» JSHS, «Eır Astana», «Qazaqtelekom», «Kınopark Stýdent», «Dostyq Sınema», «Almaty Sý» jáne taǵy basqalary bar.
Eske salsaq, qalada epıdemıologıalyq ahýal kúrdeli. Ótken táýlikte megapolıste koronavırýstyq ınfeksıanyń taǵy 1 493 jaǵdaıy tirkeldi. Infeksıalyq stasıonarlarda 5 474 adam bar, onyń ishinde 216 bala. AMSK pen Telemedısına ortalyǵynyń mobıldi toptary 11 908 naýqasty úılerinde baqylaýda.
Epıdemıologtar turǵyndardy vaksınalanýǵa shaqyrady. Búginde Almatyda 787 494 adamǵa vaksınanyń birinshi komponentti salyndy. Al, bul ujymdyq ımýnıtetti qalyptastyrý úshin áli de jetkiliksiz.
