Elorda ákimi Áset Isekeshev aqsha suraıtyn mektepter problemasyn jeke baqylaýyna almaq. Bul týraly ol búgin Astana qalasy bilim qyzmetkerleriniń Tamyz keńesinde málimdedi, dep habarlaıdy BNews.kz tilshisi.
«Bilim mekemeleri balalardy mektepke qabyldaý kezinde «oryn joq» dep syltaýratyp, aqsha suraıtyny týraly áleýmettik jelide jıi aıtylady. Osyndaı problemalarmen kezdesken qala turǵyndary tikeleı maǵan habarlasa alady», - dedi ákim.
Elorda basshysy Facebook áleýmettik jelisinde «Astana bilimi» paraǵynyń ashylǵanyn da atap ótti. Onyń aıtýynsha, jelide qalalyqtarǵa bilim bóliminiń qyzmetkerleri kómekke keledi.
«Men ózim de Facebook-tiń bul paraqshasyn baqylap otyramyn. Barlyq ustazdar qaýymyn sol jerde pikir almasýǵa shaqyramyn. Meniń oıymsha, bul eń tıimdi ádis», - dedi Isekeshev.
Sóz sońynda elorda basshysy bilim baǵdarlamalarynyń ázirlemesin baqylaýda ustaýǵa jáne jaýapty tulǵalarǵa qatysty qajetti sharalardy qabyldaýǵa ýáde berdi.
