Kúni keshe áriptesterimen júzdesken “QazTAG” HAA jetekshisi Áset Mataevtyń aýyr jaǵdaida aýrýhanaǵa túskeni belgili boldy. Alǵashynda áleýmettik jeliler men anonimdi Telegram-arnalarda bul oqiǵa “qarapaiym kóshe janjaly” retinde sipattalǵan edi. Alaida ýaqyt óte kele istiń mán-jaiy kúrdelene tústi, dep habarlaidy Dalanews.kz Elmedia.kz-ke silteme jasap.
Qazir advokattar Rena Kerimova men Elena Jigalenok óz qorǵaýyndaǵy azamattyń naqty qai jerde jatqanyn anyqtai almai otyr. Málimetterge sáikes, aýyr soqqydan keiin Mataev aýrýhanaǵa jetkizilgen, biraq onyń qai meditsinalyq mekemede ekeni aitylmai otyr. Almaty qalalyq politsiia departamenti men aýdandyq basqarma bul máselege qatysty ázirge túsinikteme bermegen.
Qorǵaýshylardyń aitýynsha, jaraqat alǵan adamdy zańdy ókilderinen jasyrý – óreskel zańbuzýshylyq. Olar Mataevtyń jaǵdaiy aýyr ekenin, shuǵyl ári bilikti meditsinalyq kómek qajet ekenin atap ótti.
Meditsinalyq saraptama qorytyndysyna sáikes, Áset Mataevtyń basynan aýyr jaraqattar anyqtalǵan. Atap aitqanda, bas súieginde ashyq jara, mańdai qýysynyń aldyńǵy jáne tómengi qabyrǵasynyń synýy, gemosinýs jáne mańdai tusynyń soǵylǵan jaraqaty tirkelgen.
Aldyn ala málimet boiynsha, janjal barysynda 5–6 adamnan turatyn top Áset Mataev pen onyń dosy Ýalihanǵa shabýyl jasaǵan. Oqiǵa kezinde aýyr metall qural – montirovka qoldanylǵan. Advokattardyń aitýynsha, qandai jaǵdai bolmasyn, aýyzsha janjal adamdy temir quralmen uryp, aýyr jaraqat salýǵa negiz bola almaidy.
Sonymen qatar bul oqiǵa basqa da daýly jaǵdailarmen tuspa-tus kelip otyr. Sońǵy ýaqytta “QazTAG” agenttigi men Freedom qurylymdary arasynda sot protsesteri júrip jatqany belgili. Osy jaǵdai aiasynda keibir taraptar oqiǵanyń kezdeisoq emestigin de alǵa tartady.
Aita keteiik, oqiǵa bolǵan Dostyk Plaza mańy beinebaqylaý kameralarymen tolyq qamtylǵan. Demek, shabýyldyń naqty qalai bolǵanyn anyqtaýǵa múmkindik bar.
Oqiǵanyń mán-jaiy áli de anyqtalyp jatyr. Elmedia redaktsiiasy jaǵdaidyń órbýin baqylaýda ustaitynyn málimdedi.
