“Kópir” dep atalatyn spektakl ata-ana men balanyń arasyndaǵy qarym-qatynasty boiamasyz sýrettepti.
Bul spektakl “Bolashaq – meniń tańdaýym” atty jobanyń aiasynda ótkizildi. Aita ketsek, atalǵan jobaǵa “Shevron” kompaniiasy qoldaý kórsetti.
“Shevron” kompaniiasy ókilderiniń aitýynsha, jastardyń durys jol tańdaýyna kómektesý, ári olardyń tulǵa retinde qalyptasýyna jol ashý kompaniianyń áleýmettik investitsiialarynyń ishindegi basty baǵyttardyń biri.
“Shevron” óziniń bilim berý baǵdarlamalary aiasynda óser urpaqtyń ómirden óz ornyn tabýyna, talantyn ashyp, qabiletin kórsetýine barynsha jaǵdai jasaidy”
– deidi kompaniia ókilderi.
Endi tikelei spektakl týraly áńgimege kóshsek.
Ideiany “Salaýatty kóshbasshylyq ýaqyty” lagerinde jazǵy demalysyn birge ótkizgen jetkinshekter oilap taýypty. Jaz boiy, qurby-qurdastary demalyp jatqanda, balalar birlesip spektakl stsenariin ázirlegen.
Buǵan “ARTiShOK” teatrynyń kásibi akteri Dmitrii Kopylov jetekshilik etip, balalarǵa teatr óneriniń qyr-syryn úiretedi.
Spektakl ne týraly?
Byltyrǵy jylǵy qoiylymnyń aqyry tragediiamen aiaqtalǵan-tuǵyn. Mekteptegi álimjettiktiń aqyr túbi nege alyp kelgenin kórip, sol qoiylymnan kóp nárse qorytqan edik.
Bul jolǵy "Kópir" dep atalatyn spektaldiń jelisi komediiaǵa qurylǵanmen kúndelikti ómirdegi ata-ana men balanyń arasynda týyndaityn kelispeýshilikterdi shynaiy beinelepti.
Eseie kele balanyń minezi, talǵamy ózgeredi. Ómirge, ortaǵa degen ózindik kózqarasy qalyptasady. Jasóspirim kezeńdegi bala minezindegi kúrdeli ózgeristerdi ata-analardyń kópshiligi ańdai almai jatady. Jastaiynan mápeletip ósirgen, ári óz aitqanyn oryndatyp úirengen ata-ana balasynyń qandai kúizeliste júrgenin sezbeýi de múmkin.
– Balanyń ata-anasy múlde qalamaityn kásipke qyzyǵýy múmkin. Aitalyq, ol rok ánshisi bolǵysy keledi. Bul jasta bala kóńili alyp-ushyp turady. Iá, ras jaqsyny da, jamandy da qabyldaýǵa beiim keledi.
Kópshilik ata-analar balanyń belgili bir ónerge degen talabyn tejep, múlde qalamaityn kásipti igerýge ikemdegisi keledi.
Osylaisha balanyń boiyndaǵy armandy "óltirip" alǵanyn ańdamaidy. Bizdiń qoǵamda bala tárbiesine kelgende árdaiym shektep, tyiyp otyryp salt qalyptasqan. Bul bir jaǵynan paidaly bolǵanymen, kesiri de kóp. Qazirgi zaman jasqanshaq emes, ójet, alǵyr, izdenimpaz, óz oiyn ashyq aita alatyn urpaqtyń zamany, – deidi Dmitrii Kopylov.
"Kópirdegi" bir kórinis sanamyzda saqtalyp qalǵany sondai, muny sizderge baiandap bergendi jón kórdik.
– Balasy ónerge qyzyǵady. Skripkany súiedi. Alaida skripka satyp alar aqshasy joq. Ákesinen suraýǵa jasqanady. Amalsyz úidegi kiim ilgishti skripkaǵa uqsatyp, ózin áigili skripkashynyń keipinde elestetedi.
Al ákesi buǵan qarsy. Balasynyń boksshy bolǵanyn qalaidy. Boksqa súireleidi. Ulynyń "áke maǵan skripka ápershi, óner jolyn qýǵym keledi" degen ótinishine qulaq aspaidy. Kerisinshe, boks qolǵabyn áperip, ulyn ózinen áldeqaida myǵym qarsylasqa qarsy sharshy alańǵa shyǵarady. Ulynyń tumsyǵy qanap, kózi kógeredi. Aýyr jaraqat alady...
"Kópir" spektakli áke men bala arasyndaǵy osyndai ómirlik kórinisterdi sheber sýrettei bilgen.
Jobaǵa "Shevron" kompaniiasy qoldaý kórsetkenin aittyq.
Kompaniia atynan sharaǵa qatysqan «Shevron» kompaniiasy BAQ jáne qoǵammen bailanys qyzmetiniń úilestirýshisi Ainur Sydyqova "Kópir" atty qoiylymnyń ózine erekshe áser etkenin, ata-ana retinde osy qoiylymnan ózin de kórgenin aityp, teatr ujymynyń jumysyna sáttilik tiledi.
– Qoiylym stsenarii ómirden alynǵan. Osy spektalge kelgen árbir ata-ana qoiylymnan ózderin syrttai baqylaǵany anyq. Balanyń talabyn shyńdap úirený qajet. Árbir bala – tulǵa. Tulǵalyq qasietti damytý úshin bala boiyndaǵy erekshelikterge erte bastan nazar aýdarý qajet, – dedi ol.
“Kópir” spektakli bizdiń de kóńilimizden shyqty. “ArtiShok” ádettegidei kórermenge lyq toly boldy. Qoiylymdy kórýge ata-analar men qatar jetkinshikter de kóptep kelgen eken. Qoiylymnyń kóp adamnyń kókeiine oi salǵany anyq.
