“كوپىر” دەپ اتالاتىن سپەكتاكل اتا-انا مەن بالانىڭ اراسىنداعى قارىم-قاتىناستى بوياماسىز سۋرەتتەپتى.
بۇل سپەكتاكل “بولاشاق – مەنىڭ تاڭداۋىم” اتتى جوبانىڭ اياسىندا وتكىزىلدى. ايتا كەتسەك، اتالعان جوباعا “شيەۆرون” كومپانياسى قولداۋ كورسەتتى.
“شيەۆرون” كومپانياسى وكىلدەرىنىڭ ايتۋىنشا، جاستاردىڭ دۇرىس جول تاڭداۋىنا كومەكتەسۋ، ءارى ولاردىڭ تۇلعا رەتىندە قالىپتاسۋىنا جول اشۋ كومپانيانىڭ الەۋمەتتىك ينۆەستيسيالارىنىڭ ىشىندەگى باستى باعىتتاردىڭ ءبىرى.
“شيەۆرون” ءوزىنىڭ ءبىلىم بەرۋ باعدارلامالارى اياسىندا وسەر ۇرپاقتىڭ ومىردەن ءوز ورنىن تابۋىنا، تالانتىن اشىپ، قابىلەتىن كورسەتۋىنە بارىنشا جاعداي جاسايدى”
– دەيدى كومپانيا وكىلدەرى.
ەندى تىكەلەي سپەكتاكل تۋرالى اڭگىمەگە كوشسەك.
يدەيانى “سالاۋاتتى كوشباسشىلىق ۋاقىتى” لاگەرىندە جازعى دەمالىسىن بىرگە وتكىزگەن جەتكىنشەكتەر ويلاپ تاۋىپتى. جاز بويى، قۇربى-قۇرداستارى دەمالىپ جاتقاندا، بالالار بىرلەسىپ سپەكتاكل سەناريىن ازىرلەگەن.
بۇعان “ارتيشوك” تەاترىنىڭ كاسىبي اكتەرى دميتريي كوپىلوۆ جەتەكشىلىك ەتىپ، بالالارعا تەاتر ونەرىنىڭ قىر-سىرىن ۇيرەتەدى.
سپەكتاكل نە تۋرالى؟
بىلتىرعى جىلعى قويىلىمنىڭ اقىرى تراگەديامەن اياقتالعان-تۇعىن. مەكتەپتەگى الىمجەتتىكتىڭ اقىر ءتۇبى نەگە الىپ كەلگەنىن كورىپ، سول قويىلىمنان كوپ نارسە قورىتقان ەدىك.
![](/uploads/images/20240127224946903.jpg)
بۇل جولعى "كوپىر" دەپ اتالاتىن سپەكتالدىڭ جەلىسى كومەدياعا قۇرىلعانمەن كۇندەلىكتى ومىردەگى اتا-انا مەن بالانىڭ اراسىندا تۋىندايتىن كەلىسپەۋشىلىكتەردى شىنايى بەينەلەپتى.
ەسەيە كەلە بالانىڭ مىنەزى، تالعامى وزگەرەدى. ومىرگە، ورتاعا دەگەن وزىندىك كوزقاراسى قالىپتاسادى. ءجاسوسپىرىم كەزەڭدەگى بالا مىنەزىندەگى كۇردەلى وزگەرىستەردى اتا-انالاردىڭ كوپشىلىگى اڭداي الماي جاتادى. جاستايىنان ماپەلەتىپ وسىرگەن، ءارى ءوز ايتقانىن ورىنداتىپ ۇيرەنگەن اتا-انا بالاسىنىڭ قانداي كۇيزەلىستە جۇرگەنىن سەزبەۋى دە مۇمكىن.
– بالانىڭ اتا-اناسى مۇلدە قالامايتىن كاسىپكە قىزىعۋى مۇمكىن. ايتالىق، ول روك ءانشىسى بولعىسى كەلەدى. بۇل جاستا بالا كوڭىلى الىپ-ۇشىپ تۇرادى. ءيا، راس جاقسىنى دا، جاماندى دا قابىلداۋعا بەيىم كەلەدى.
كوپشىلىك اتا-انالار بالانىڭ بەلگىلى ءبىر ونەرگە دەگەن تالابىن تەجەپ، مۇلدە قالامايتىن كاسىپتى يگەرۋگە يكەمدەگىسى كەلەدى.
وسىلايشا بالانىڭ بويىنداعى ارماندى "ءولتىرىپ" العانىن اڭدامايدى. ءبىزدىڭ قوعامدا بالا تاربيەسىنە كەلگەندە ءاردايىم شەكتەپ، تىيىپ وتىرىپ سالت قالىپتاسقان. بۇل ءبىر جاعىنان پايدالى بولعانىمەن، كەسىرى دە كوپ. قازىرگى زامان جاسقانشاق ەمەس، وجەت، العىر، ىزدەنىمپاز، ءوز ويىن اشىق ايتا الاتىن ۇرپاقتىڭ زامانى، – دەيدى دميتريي كوپىلوۆ.
![](/uploads/images/20240127224947413.jpg)
"كوپىردەگى" ءبىر كورىنىس سانامىزدا ساقتالىپ قالعانى سونداي، مۇنى سىزدەرگە بايانداپ بەرگەندى ءجون كوردىك.
– بالاسى ونەرگە قىزىعادى. سكريپكانى سۇيەدى. الايدا سكريپكا ساتىپ الار اقشاسى جوق. اكەسىنەن سۇراۋعا جاسقانادى. امالسىز ۇيدەگى كيىم ىلگىشتى سكريپكاعا ۇقساتىپ، ءوزىن ايگىلى سكريپكاشىنىڭ كەيپىندە ەلەستەتەدى.
![](/uploads/images/20240127224947933.jpg)
ال اكەسى بۇعان قارسى. بالاسىنىڭ بوكسشى بولعانىن قالايدى. بوكسقا سۇيرەلەيدى. ۇلىنىڭ "اكە ماعان سكريپكا اپەرشى، ونەر جولىن قۋعىم كەلەدى" دەگەن وتىنىشىنە قۇلاق اسپايدى. كەرىسىنشە، بوكس قولعابىن اپەرىپ، ۇلىن وزىنەن الدەقايدا مىعىم قارسىلاسقا قارسى شارشى الاڭعا شىعارادى. ۇلىنىڭ تۇمسىعى قاناپ، كوزى كوگەرەدى. اۋىر جاراقات الادى...
"كوپىر" سپەكتاكلى اكە مەن بالا اراسىنداعى وسىنداي ومىرلىك كورىنىستەردى شەبەر سۋرەتتەي بىلگەن.
جوباعا "شيەۆرون" كومپانياسى قولداۋ كورسەتكەنىن ايتتىق.
كومپانيا اتىنان شاراعا قاتىسقان «شيەۆرون» كومپانياسى ب ا ق جانە قوعاممەن بايلانىس قىزمەتىنىڭ ۇيلەستىرۋشىسى اينۇر سىدىقوۆا "كوپىر" اتتى قويىلىمنىڭ وزىنە ەرەكشە اسەر ەتكەنىن، اتا-انا رەتىندە وسى قويىلىمنان ءوزىن دە كورگەنىن ايتىپ، تەاتر ۇجىمىنىڭ جۇمىسىنا ساتتىلىك تىلەدى.
![](/uploads/images/20240127224949109.jpg)
– قويىلىم سەناريى ومىردەن الىنعان. وسى سپەكتالگە كەلگەن ءاربىر اتا-انا قويىلىمنان وزدەرىن سىرتتاي باقىلاعانى انىق. بالانىڭ تالابىن شىڭداپ ۇيرەنۋ قاجەت. ءاربىر بالا – تۇلعا. تۇلعالىق قاسيەتتى دامىتۋ ءۇشىن بالا بويىنداعى ەرەكشەلىكتەرگە ەرتە باستان نازار اۋدارۋ قاجەت، – دەدى ول.
“كوپىر” سپەكتاكلى ءبىزدىڭ دە كوڭىلىمىزدەن شىقتى. “ارتيشوك” ادەتتەگىدەي كورەرمەنگە لىق تولى بولدى. قويىلىمدى كورۋگە اتا-انالار مەن قاتار جەتكىنشىكتەر دە كوپتەپ كەلگەن ەكەن. قويىلىمنىڭ كوپ ادامنىڭ كوكەيىنە وي سالعانى انىق.
![](/uploads/images/20240127224949610.jpg)