“ArselorMittal Temirtaý” kompaniiasynyń zańgeri Irina Emdi óltirý kúdigimen sottalǵandarǵa qatysty aldynda shyqqan sot úkiminiń kúshi joiylyp, qylmystyq is qaitadan qaraýǵa jiberildi, dep habarlaidy Dalanews.kz.
“Qaraǵandy oblystyq sotymen Qaraǵandy oblysynyń qylmystyq ister jónindegi mamandandyrylǵan aýdanaralyq sotynyń 2024 jylǵy 16 aqpandaǵy J., R.-ǵa qatysty úkiminiń kúshi joiyldy jáne qylmystyq is ózge quramdaǵy aldyn ala tyńdaý satysynan bastap sol sotqa jańa qaraýǵa jiberildi”, - delingen Qaraǵandy oblystyq soty málim etken habarlamada.
Birinshi satydaǵy sotta is alqabilerdiń qatysýymen qaraldy, olardyń úkimimen mynandai aiyptaý úkimi shyǵaryldy:
- J. 99-babynyń 2-bóligi 7) tarmaqshasy, 202-babynyń 2-bóligi 1), 5) tarmaqshalary, 58-babynyń 4 bóligi boiynsha qylmystyq-atqarý júiesiniń orta qaýipsizdik mekemesinde jazasyn óteýmen 18 jylǵa bas bostandyǵynan aiyrý jazasyna sottaldy.
- . QK-niń 99-babynyń 2-tarmaǵynyń 7) tarmaqshasy boiynsha qylmystyq-atqarý júiesiniń ortasha qaýipsizdik mekemesinde jazasyn óteýmen 17 jylǵa bas bostandyǵynan aiyrýǵa sottaldy.
Eske salaiyq, ótken jyly Shahtinsk qalasynda órtengen páterden “ArselorMittal Temirtaý” kompaniiasy zańgeriniń denesi tabylǵan bolatyn.
Oblystyq tótenshe jaǵdailar departamentiniń málimetinshe, qaiǵyly oqiǵa 23 sáýirde túste bolǵan.
23 sáýirde saǵat 13:01-de Jeńiske 40 jyl kóshesinde bes qabatty úidiń órtenip jatqany týraly habarlama tústi. Úidiń joǵarǵy qabatynda jihazdar men zattar órtengen. Órttiń jalpy aýdany – 6 sharshy metr. Oqiǵa ornynan 1969 jyly týǵan áieldiń denesi tabyldy. Mamandar turǵyn úiden 9 adamdy evakýatsiialady. Órt saǵat 13:31-de tolyq sóndirildi. Oqiǵanyń mán-jaiy anyqtalyp jatyr, - dep jazylǵan habarlamada.
Qaraǵandy oblysy PD baspasóz qyzmetiniń málimetinshe, 54 jastaǵy áieldiń denesinen pyshaq izderi anyqtalǵan. Ol “ArselorMittal Temirtaý” kompaniiasynyń zańgeri bolǵan.
"Qylmystyq kodekstiń 99-baby 1-bóligi ("Adam óltirý") boiynsha is qozǵaldy. Búginde oqiǵanyń mán-jaiyn anyqtaý boiynsha jedel-izdestirý is-sharalary júrgizilip jatyr. Qajet saraptama taǵaiyndaldy", - dep jazylǵan habarlamada.
