QR Saýda jáne integratsiia ministri Arman Shaqqaliev 1 qańtarda elordadaǵy saýda jelilerine monitoring jumystaryn júrgizdi. Vedomstvo basshysy Small, Magnum, Anvar siiaqty iri saýda jelilerin aralady, dep habarlaidy Dalanews.kz
Saýda jelileri búgin 10:00-de óz jumysyn bastady. Alǵashqy kelýshilerdiń biri bolǵan saýda ministri baǵa turaqtylyǵy men sóredegi taýarlardyń qoljetimdiligine, assortimentine basa nazar aýdardy.
“Biz arnaiy 1-qańtarda saýda jelilerin aralap shyqtyq. Maqsatymyz - búgingi baǵanyń turaqty ekenine kóz jetkizý. Eshqandai ózgeris, tapshylyq joq. Jańa jyldyń aldynda biz saýda jelilerimen birlesip Bereke fest aktsiiasyn ótkizdik. Saýda jelileri áli de túrli jeńildikter usynyp jatyr. Sórede taýar toly. Osyndai turaqty jaǵdai barlyq saýda obektisinde bolýy kerek”,-dedi Arman Shaqqaliev.
Saýda jelileriniń ókilderimen kezdesken ministr baǵany turaqty ustaýdy jáne ony negizsiz ósirmeýdi tapsyrdy. Sondai-aq ministr áleýmettik mańyzy bar azyq-túlik taýarlarynyń saýda ústemesine baqylaý jumysy júieli júrgizilip jatqanyn eske saldy.
Mundai monitoring jumystaryn ministrdiń tapsyrmasymen óńirlerdegi saýda jáne tutynýshylardyń quqyǵyn qorǵaý departamentteri jergilikti ákimdikpen birlesip belsendi júrgizip jatyr. Aita ketý kerek sońǵy 6 apta boiy ÁMAT taýarlarynyń baǵasy turaqty.
