Sporttyq-saýyqtyrý kesheniniń qurylysy tamyz aiynda bastalǵan bolatyn. Onda jergilikti turǵyndardyń kúres, aýyr atletika, dziýdo, sambo, shahmat, basketol, voleibol sekildi sport túrlerimen shuǵyldanýyna bar múmkindik jasalǵan.
– Jekemenshik áriptestik sheńberinde boi kótergen zamanaýi jańa sport kesheninde bir mezgilde 120 sportshynyń jattyǵýyna barlyq jaǵdai jasalǵan. Záýlim ǵimaratta sport súier azamattar men jas balalar, jalpy arystyqtar sportpen ainalysa alady. Sonymen qatar bul shańyraqta el namysyn qoldan bermeitin bolashaq Olimpiada chempiondary tárbielenedi dep senemiz, – dedi quttyqtaý sózinde «Samuryq-Qazyna» jyljymaityn múlik qory» AQ Basqarma tóraǵasy Arman Jetpisbaev.
Aita ketý kerek, «Samuryq-Qazyna» ál-aýqat qory qaladaǵy 68 nysandy qalpyna keltirýge qol ushyn sozyp, 53 bilim berý nysany, 8 densaýlyq saqtaý, 4 sport, 3 qoǵamdyq oryn nysandaryn tolyq jóndeýden ótkizdi.
Sondai-aq, Arys qalasyndaǵy temir jol vokzaly, «Batyrlar Alleiasy» men 1200 oryndyq ortalyq alań tolyq qaita qalpyna keltirildi. 16 mektep jańa jihazben qamtamasyz etildi. Sport jáne oiyn alańqailary jóndeýden ótti.
Jalpy, Túrkistan oblysynda 64 sport nysandary jumys isteidi. Onyń 4-i Arys qalasynda ornalasqan. Biyl oblys boiynsha 3 sport kesheni halyq igiligine paidalanýǵa berilse, kelesi jyly dál osyndai 11 nysannyń qurylys jobasy daiyndalǵan.
Buqaralyq sportty damytý maqsatynda jyl basynan beri 4 myńǵa jýyq is-sharalar ótkizilip, oǵan 436 myńnan astam adam qatysty. «2019 jyl – Jastar jyly» aiasynda eresekter arasynda 9 sport túrinen Spartakiada ótti. Oblys kóleminde 52 (26 olimpiadalyq, 26 olimpiadalyq emes) sport túrleri damytylýda.
Óńir sportshylary sporttyń 52 túri boiynsha QR chempionattaryna qatysyp, 215 – altyn,174 – kúmis, 237 – qola medal jeńip aldy. Biyl 2 halyqaralyq dárejedegi sport sheberi, 4 QR sport sheberi, 116 sport sheberine úmitker sportshylar daiyndaldy.
