Antikor tóraǵasynyń orynbasary Darhan Quraqbaev májilistiń eks-spikeri Nurlan Nyǵmatýlinniń aǵasy Arǵyn Nyǵmatýlin Qazaqstanda joq ekenin aitty, dep habarlaidy Dalanews.kz.
"Ol tergeý bastalǵanǵa deiin Qazaqstannan ketip qalǵan. Ony izdep, elge qaitarý boiynsha jumystar júrgizilip jatyr, deidi Quraqbaev senat kýlýarynda.
Nyǵmatýlinge qatysty is
Qazir Arǵyn Nyǵmatýlinge jáne Qaraǵandy oblysynda hokkeidi damytýǵa bólingen biýdjet qarajatyn jymqyrdy degen kúdikke ilingen basqa da adamdarǵa qatysty qylmystyq is tergelip jatyr.
Al buǵan deiin Sybailas jemqorlyqqa qarsy qyzmet Nurlan Nyǵmatýlinniń aǵasy Arǵyn Nyǵmatýlindi izdep jatqany habarlandy.
Bul is biyl 3 naýryzda Astanada tirkeldi. Izdeýge bastama jasaǵan - prokýratýra.
Ashyq derekkóz málimetinshe, Arǵyn Nyǵmatýlin - Májilistiń burynǵy tóraǵasy Nurlan Nyǵmatýlinniń jáne eks-depýtat Erlan Nyǵmatýlinniń aǵasy.
Ol 1955 jyly 28 maýsymda dúniege kelgen. 2007 jyly sáýirden 2018 jylǵa deiin «Saryarqa» hokkei klýby» JShS direktory qyzmetin atqardy. Qaraǵandy oblystyq máslihatynyń depýtaty boldy.
