Astanada Islam damý banki, Saýd Arabiiasynyń damý qory, OPEK halyqaralyq damý qory, Kýveit ekonomikalyq damý qory jáne Abý-Dabi damý qory syndy institýttardy biriktiretin Arab úilestirý tobynyń (AÚT) otyrysy ótti, - dep habarlaidy Dalanews.kz.
Is-sharaǵa QR Premer-Ministriniń orynbasary – ulttyq ekonomika ministri Nurlan Baibazarov, Islam damý banki tobynyń prezidenti Muhammed Sýleiman Ál-Djasser, Arab investitsiialyq qorlary men elimizdiń memlekettik organdary ári kvazimemlekettik kompaniialardyń basshylary qatysty.
Kezdesýdiń basty maqsaty Arab úilestirý tobynyń Qazaqstan úshin basymdyqqa ie infraqurylymdyq jáne áleýmettik jobalardy qarjylandyrýy boldy.
Nurlan Baibazarov óziniń alǵy sózinde elimizdiń investitsiialyq múmkindikterine qyzyǵýshylyq tanytqany úshin Arab úilestirý tobyna alǵys bildirdi.
«Búgin Qazaqstan Respýblikasynda Arab úilestirý tobynyń birinshi dóńgelek ústel otyrysyn ótkizý arqyly berik ári uzaq merzimdi yntymaqtastyq baǵytynda birlesken alǵashqy qadam jasaimyz. Qoldaýlaryńyz ben yntymaqtastyqqa daiyn bolýlaryńyz biz úshin mańyzdy elimizdiń áleýetin moiyndaý bolyp tabylady», — dedi ol.
Dóńgelek ústel barysynda kólik, energetika, sý resýrstary, densaýlyq saqtaý salalaryndaǵy jobalar tanystyryldy, sondai-aq Qazaqstannyń 2030 jylǵa deiingi Ulttyq infraqurylymdyq jospary usynyldy.
Óz kezeginde Arab úilestirý toby delegatsiiasynyń ókilderi elimizdiń áleýmettik-ekonomikalyq jáne infraqurylymdyq damý jónindegi kúsh-jigerin joǵary baǵalady.
Kezdesý qorytyndysy boiynsha taraptar dóńgelek ústel otyrysynyń hattamasyna, OPEK qorymen jeke sektordaǵy operatsiialar týraly negizdemelik kelisimge jáne Sý resýrstary jáne irrigatsiia ministrligi men Islam damý banki arasyndaǵy kelissózder hattamasyna qol qoidy. Qol qoiylǵan qujattar odan ári yntymaqtastyq salalar men áleýetti jobalardyń aldyn ala tizbesin aiqyndaidy.
Qol jetkizilgen ýaǵdalastyqtar aiasynda Qazaqstan ekonomikasyna uzaq merzimdi tikelei investitsiialardyń somasy bastapqy kezeńde $7 mlrd quraýy múmkin. Bolashaqta qarjylandyrý kólemin ulǵaitý josparlanýda.
Qorytyndylai kele, Nurlan Baibazarov Qazaqstan ekonomikasynyń turaqty damýyna jáne elder arasyndaǵy ekonomikalyq bailanysty nyǵaitýǵa yqpal etetin aýqymdy jobalardy iske asyrýda áriptestik qatynas pen ózara tiimdi yntymaqtastyqty saqtap, odan ári nyǵaitýǵa senim bildirdi.
