Aqtóbe oblysynda eki balalar men jasóspirimder sport mektebiniń direktorlary biýdjet qarajatyn jeke qajettilikterine, sonyń ishinde býkmekerlik utystarǵa jumsady degen kúdikke ilindi. Bul týraly oblystyq prokýratýranyń baspasóz qyzmeti málimdedi, dep habarlaidy Dalanews.kz.
“Olar 12 million teńgeden astam biýdjet qarajatyn óz qajettilikterine, onyń ishinde býkmekerlik utystarǵa tikken”, – delingen resmi málimdemede.
Oblystyq prokýratýranyń málimetinshe, sport mektepteriniń basshylary sporttyq alańdar men zaldardy jalǵa berýden túsken qarajatty zańsyz iemdengen. Bul qarajat biýdjetke túsýi tiis bolǵan.
“Atalǵan faktiler boiynsha prokýratýra eki qylmystyq is qozǵady. Tergeýdi oblystyq ekonomikalyq tergeý departamenti júrgizdi. 2025 jylǵy 10 qańtarda tergeý aiaqtalyp, qylmystyq ister biriktirilip, sotqa joldandy”, – dep habarlady vedomstvo.
