Aqtóbede "Harmony Rider Technology" (HRT) ataýymen qarjy piramidasyn quryp, oǵan basshylyq etken, sondai-aq qylmystyq jolmen alynǵan qarajatty zańdastyrǵan tulǵalarǵa qatysty sot úkimi shyqty. Isti Qarjylyq monitoring agenttiginiń Aqtóbe oblysy boiynsha departamenti tergegen, dep habarlaidy Dalanews.kz.
Tergeý málimetinshe, 2024 jyly bir top adam ózin shetelde elektrosamokattardy satyp alyp, olardy jalǵa berýmen ainalysatyn halyqaralyq kompaniia retinde tanystyryp, qarjy piramidasynyń jumysyn uiymdastyrǵan. Shyn máninde, salymshylarǵa tólenetin tabys jańa qatysýshylardan túsken qarajat esebinen qalyptasqan.
Azamattardy tartý úshin kúdiktiler áleýmettik jeliler men messendjerlerde jarnama júrgizip, oflain kezdesýler men tanystyrylymdar uiymdastyrǵan. Zańdy qyzmet áserin qalyptastyrý maqsatynda Aqtóbe qalasynda keńse jalǵa alynyp, úgit-nasihat jumystary júrgizilgen.
Salym kólemi 350-den 20 myń AQSh dollaryna deiin jetse, ýáde etilgen tabys táýligine 12-den 690 AQSh dollaryna deiin bolǵan. Qarajatty zańdastyrý úshin olar kriptoámiiandardy paidalanyp, keiin ony aiyrbastap, bank shottaryna aýdaryp otyrǵan.
Zańsyz áreket saldarynan qarjy piramidasyna 115 salymshydan jalpy somasy 197 million teńgeden astam qarajat tartylǵan. Bul qarajatqa uiymdastyrýshylar úsh avtokólik satyp alyp, onyń birin týysynyń atyna rásimdegen.
Sot úkimimen uiymdastyrýshylar 6 jylǵa deiin bas bostandyǵynan aiyryldy. Sonymen qatar úsh avtokólik memleket kirisine tárkilendi. Úkim zańdy kúshine endi.
