Aqtóbede qarjy pıramıdasynyń qyzmeti toqtatyldy, dep habarlaıdy Dalanews.kz.

Aqtóbe oblysy boıynsha Ekonomıkalyq tergeý departamentimen «Harmony Rider Technology» (HRT) ınvestısıalyq joba retinde jasyrylǵan qarjy pıramıdasynyń qyzmeti toqtatyldy.

Ózin elektrosamokattardy jalǵa berýmen aınalysatyn amerıkalyq kompanıa retinde tanystyrǵan bul uıym azamattarǵa kún saıyn 12-den 690 AQSH dollaryna deıin tabys tabýdy ýáde etken.

Sondaı-aq, jańa ınvestorlardy tartqany úshin krıptovalúta túrinde bonýstar usynylǵan. Alaıda is júzinde tólemder jańa salymshylardyń qarajatynan júzege asyrylyp otyrǵan, bul qarjy pıramıdasynyń aıqyn belgilerin kórsetedi.

Alaıaqtyq shema saldarynan 100-den astam adam zardap shekti. Tartylǵan qarajattyń jalpy somasy 197 mln teńgeni qurady. Urlanǵan aqsha krıptovalúta ámıandaryna, sodan keıin jeke bank shottaryna aýdarylǵan.

Qylmystyq is aıasynda 70 mln teńgeden astam somaǵa múlikke tyıym salyndy. Tergeý aıaqtalyp, qylmystyq is sotqa joldandy.