Aqtóbe qalasynda «Jol qozǵalysy jáne tsifrlyq tehnologiialar qaýipsizdigin qamtamasyz etý ortalyǵy» KMM direktory A. Tilmaǵambetovke qatysty qylmystyq is boiynsha úkim shyqty. Bul týraly Sybailas jemqorlyqqa qarsy is-qimyl agenttigi málimdedi, dep habarlaidy Dalanews.kz.
Memleket basshysynyń tapsyrmasy aiasynda zańdylyq pen tártip qaǵidatyn qamtamasyz etýge erekshe kóńil bólinýde. Osy baǵytta júrgizilgen tergeý nátijesinde Tilmaǵambetov jeke kásipker A. Kýsýmovpen birlesip, jalǵan memlekettik satyp alý shartyn jasasqany jáne naqty oryndalmaǵan jumystar úshin 35 mln teńge kóleminde qarajat iemdengeni anyqtalǵan.
Zańnama talaptaryn óreskel buza otyryp, satyp alý bir kózden alý tásilimen iske asyrylǵan. Sonymen qatar, Tilmaǵambetov merdiger uiymdarmen kepildik mindettemeleri aiasynda atqarylýy tiis jol tańbalaryn salý jumystaryn da memlekettik satyp alý sharttary arqyly rásimdep, 237 mln teńge biýdjet qarjysyn maqsatsyz jumsaǵan.
Aqtóbe qalasynyń №2 sotynyń sheshimimen Tilmaǵambetov 8 jylǵa bas bostandyǵynan aiyryldy. Sonymen qatar, ol ómir boiy memlekettik qyzmette, sýdiada jáne jergilikti ózin-ózi basqarý organdarynda qyzmet etý quqyǵynan aiyryldy.
Onyń sybailasy A. Kýsýmov 7 jylǵa sottalyp, kommertsiialyq jáne memlekettik uiymdarda materialdyq jaýapkershiligi bar laýazymdardy atqarý quqyǵynan ómir boiyna aiyryldy.
Aita keteiik, bul úkim áli zańdy kúshine engen joq. QR Konstitýtsiiasynyń 77-baby men Qylmystyq-protsestik kodekstiń 19-babyna sáikes, adamnyń kinási sottyń zańdy kúshine engen úkimimen ǵana anyqtalady.
