Aqtóbe oblysynda "Qazhrom TUK" AQ-ǵa qarasty Dóń taý-ken baiytý kombinatynda jarylys oryn alyp, tórt jumysshy kúiik shaldy. Atalǵan is boiynsha qylmystyq is qozǵaldy, dep habarlaidy Dalanews.kz.
Oqiǵanyń mán-jaiy
28 aqpanda kásiporyn aýmaǵynda sýtegi taralyp, sonyń saldarynan ken ornynda qysqa merzimdi janý protsesi bolǵan. Aqtóbe oblysy ákimdiginiń málimetinshe, tótenshe jaǵdaidan zardap shekken tórt qyzmetkerge meditsinalyq kómek kórsetilip, olar dárigerlerdiń baqylaýynda.
Qylmystyq is qozǵaldy
Oqiǵaǵa bailanysty politsiia «taý-ken nemese qurylys jumystaryn júrgizý kezinde qaýipsizdik talaptarynyń buzylýy» faktisi boiynsha qylmystyq is qozǵady.
"Qazhrom TUK" AQ Dóń taý-ken baiytý kombinatynda sýtegin shashylyp, saldarynan termiialyq kúiikpen 4 adam aýrýhanaǵa jetkizildi. Politsiia taý-ken nemese qurylys jumystaryn júrgizý kezinde qaýipsizdik erejelerin buzý faktisi boiynsha qylmystyq isti tirkedi", - dedi Asaýp Baýyrjan PD Tergeý basqarmasynyń bastyǵy.
Kásiporyn resmi málimdeme jasady
Dóń taý-ken baiytý kombinaty da bul aqparatty rastady. Kásiporyn ókilderiniń aitýynsha, oqys oqiǵa «Bolashaq» shahtasyndaǵy burǵylaý jumystary kezinde oryn alǵan.
"Qysqa merzimdi janý saldarynan tórt qyzmetker kúiik alyp, dereý aýrýhanaǵa jetkizildi. Barlyq zardap shekkenderge qajetti meditsinalyq kómek kórsetilýde. Oqiǵanyń naqty sebepteri anyqtalýda. Tergeý aiaqtalǵanǵa deiin shahtadaǵy ken óndirý jumystary ýaqytsha toqtatyldy", – delingen kombinattyń resmi habarlamasynda.
