Búgin Aqtóbe qalasynyń Almaty aýdanynda jeke turǵyn úilerdiń birinen áiel adam men úsh kámeletke tolmaǵan balanyń denesi tabyldy, dep habarlaidy Dalanews.kz.
Aldyn ala málimetterge sáikes, qaiǵyly oqiǵa gaz jabdyqtaryn durys paidalanbaý saldarynan tabiǵi gazdan ýlaný nátijesinde oryn alýy múmkin. Oqiǵanyń naqty sebepteri men mán-jailary anyqtalýda.
Aqtóbe oblysynyń ákimi tapsyrmasymen jaǵdaidy jan-jaqty zerdeleý úshin arnaiy komissiia quryldy. Komissiiany Aqtóbe qalasynyń ákimi Azamat Beket basqarady. Komissiia ýákiletti organdarmen ózara is-qimyl jasai otyryp, tekserý júrgizip, tergeý qorytyndysy boiynsha tiisti sharalar qabyldaidy.
Qazirgi ýaqytta quzyrly organdar tarapynan tergeý amaldary bastaldy.
Aqtóbe oblysynyń ákimdigi marqumdardyń týǵan-týystary men jaqyndaryna qaiǵyra kóńil aitady. Jergilikti atqarýshy organdar tarapynan jerleý rásimin uiymdastyrýǵa kómek kórsetilip, sondai-aq qajetti materialdyq jáne áleýmettik qoldaý kórsetiletin bolady.
Politsiia málimetinshe, marqum áiel 1993 jyly týǵan.
