Aqtaýda tehnikalyq qyzmet kórsetý stantsiiasynda iri órt shyǵyp, eki adam aýyr kúiikpen oblystyq aýrýhananyń jansaqtaý bólimine jetkizildi, dep habarlaidy Dalanews.kz "Lada.kz"-ke silteme jasap.
Oqiǵa 6 aqpan kúni tańerteń 29A shaǵynaýdanynda ornalasqan eki qabatty, bes bokstan turatyn avtokólik jóndeý stantsiiasynda bolǵan. Órt shyqqan nysannan órt sóndirý bólimine deiingi qashyqtyq shamamen 4 shaqyrymdy quraidy.
Tótenshe jaǵdailar departamentiniń málimetinshe, órt saldarynan stantsiianyń eki garaj boksy tolyqtai otqa oranǵan. Ǵimarat ishinde bolǵan eki adam termiialyq kúiik alyp, shuǵyl túrde oblystyq aýrýhanaǵa jetkizilgen.
Zardap shekkenderdiń biri – 1993 jyly týǵan, Ózbekstan Respýblikasynyń azamaty. Ol STO-da jumys istegen. Dárigerler onyń basy, beti, tynys alý joldary, moiny, qol-aiaǵy, keýde tusy, ish jáne arqa aimaǵy kúigenin anyqtaǵan. Denesiniń shamamen 90 paiyzy zaqymdalǵan.
Ekinshi zardap shekken adam da atalǵan stantsiianyń qyzmetkeri. Onyń beti, qulaq qalqandary, keýdesiniń sol jaq bóligi, eki qoly, san jáne taban aimaqtary kúigen. Kúiik kólemi 25–30 paiyzdy quraidy, jaraqattyń II–III dárejesi tirkelgen. Sonymen qatar, joǵarǵy tynys joldarynyń ingaliatsiialyq termiialyq kúiigi anyqtalǵan.
Dárigerler eki naýqastyń da jaǵdaiyn aýyr dep baǵalap otyr. Olar jansaqtaý bóliminde jasandy tynys alý apparatyna qosylǵan.
Órt saldarynan ǵimarat ishinde úsh avtokólik qatty zaqymdanǵan.
Órttiń jalpy aýmaǵy 150 sharshy metrdi quraǵan. Órt 09:21-de oqshaýlanyp, 10:43-te tolyqtai sóndirildi. Qazirgi tańda órttiń shyǵý sebebi anyqtalyp jatyr.
Tilsiz jaýdy sóndirýge tótenshe jaǵdailar qyzmetinen 23 adam jáne 4 tehnika, politsiia departamentinen 8 qyzmetker men 4 tehnika, sondai-aq Apat meditsinasy ortalyǵynan 4 maman men 1 tehnika jumyldyrylǵan.
