Jýyrda BAQ pen áleýmettik jelilerde aqtaýlyq komandir jańadan kelgen sarbazdardyń basynan dýbinkamen uryp, tisin qaǵyp alǵany týraly aqparat tarady. Bas áskeri prokýratýra ókilderi Aqtaýda komandir áskerge shaqyrylýshylardy uryp-soqqan oqiǵaǵa qatysty pikir bildirdi, - dep habarlaidy Dalanews.kz.
Vedomstvo ókilderi ofitser nege jazalanbaǵanyn, al is nelikten "taraptar tatýlasqany úshin" toqtatylǵanyn aitty.
Bas áskeri prokýratýra málimetinshe, sarbazdy urǵan komandir 2017 jyldan 2024 jylǵa deiin Qorǵanys ministrliginde qyzmet etken. 2017 jyldan 2021 jylǵa deiin Qurlyq áskeriniń Áskeri institýtynda oqyǵan. Ofitserlik qyzmette 2021 jylǵy maýsymnan 2024 jylǵy naýryzǵa deiin qyzmet atqardy.
25744 áskeri bóliminiń 2-shi shabýyldaý batalonynyń minomet batareiasynyń 1-vzvodynyń komandiri QR QK-niń 451-baby 1-bóligi boiynsha jaýapkershilikke tartylǵan.
QR QK 451-baby 1-bóliginiń sanktsiiasy bes myń ailyq eseptik kórsetkishke deiingi mólsherde aiyppul túrindegi jazany ne sol mólsherde túzeý jumystaryn ne bes jylǵa deiingi merzimge bas bostandyǵyn shekteýdi ne sol merzimge bas bostandyǵynan aiyrýdy kózdeidi. Osylaisha, eń joǵary jaza - bes jylǵa bas bostandyǵynan aiyrý.
"QK-niń 11-babynyń 3-bóligine sáikes D.Oralbaevqa qatysty is-áreket aýyrlyǵy ortasha qylmystar sanatyna jatady. Sot talqylaýynda merzimdi qyzmettiń jábirlenýshi áskeri qyzmetshileri taraptar tatýlasqany úshin D.Oralbaevqa qatysty qylmystyq isti toqtatý týraly ótinish jasaǵan, óitkeni keltirilgen ziian óteldi, shaǵymdar bolmaǵan, sonymen qatar, kinásin tolyq moiyndaǵan. Aqtóbe garnizonynyń áskeri soty 2024 jylǵy 13 naýryzda taraptar tatýlasýyna bailanysty D.Oralbaevqa qatysty qylmystyq isti toqtatý týraly sheshim qabyldady", - dep málimdedi Bas áskeri prokýratýra ókili Tengrinews.kz-ke.
Sondai-aq, Qorǵanys ministriniń buiryǵymen 25744 áskeri bóliminiń komandiri B.B. Ábibýllaev pen onyń tárbie jáne ideologiialyq jumys jónindegi orynbasary B.Sh. Jótekov laýazymdarynan bosatyldy.
Komandir D.Oralbaevtyń ózi 27 naýryzda áskeri qyzmetten bosatyldy.
