Ázirbaijan men Resei 2024 jylǵy 25 jeltoqsanda Aqtaý mańynda apatqa ushyraǵan Azerbaijan Airlines áýe kompaniiasynyń Embraer 190 ushaǵyna qatysty máseleni retteý jóninde kelisimge keldi, dep dalanews.kz tilshisi kznews.kz saityna silteme jasap habarlaidy.
Bul týraly eki eldiń syrtqy ister ministrlikteri birlesken málimdeme jariialady. Qujatta taraptardyń ushaq apatynyń saldaryn tolyq retteý, sonyń ishinde ótemaqy tóleý máselesi boiynsha ortaq sheshimge kelgeni aitylǵan.
Málimdemege sáikes, mundai ýaǵdalastyqqa 2025 jylǵy 9 qazanda Dýshanbede Ázirbaijan prezidenti Ilham Áliev pen Resei prezidenti Vladimir Pýtinniń kezdesýi kezinde qol jetkizilgen.
Qujatta ushaqtyń Resei áýe keńistiginde áýe qorǵanys júiesiniń abaisyz áreketi saldarynan zaqymdanǵany kórsetilgen. Taraptar qabyldanǵan sheshimder eki el arasyndaǵy ózara tiimdi yntymaqtastyqty saqtaýǵa jáne qarym-qatynasty odan ári damytýǵa baǵyttalǵanyn atap ótti.
Sondai-aq Ázirbaijan men Resei syrtqy ister ministrlikteri eki el arasyndaǵy bailanys ózara qurmet, senim jáne ortaq múddeler negizinde nyǵaia beretinine senim bildirdi.
"Qaiǵyly oqiǵa saldarynan qaza tapqandardyń týystary men jaqyndaryna taǵy da qaiǵyryp kóńil aitamyz", – delingen birlesken málimdemede.
Aita keteiik, buǵan deiin Dýshanbede ótken kezdesýde Vladimir Pýtin Ilham Álievke apatqa qatysty óz túsindirmesin aitqan bolatyn. Resei prezidentiniń sózinshe, sol kúni Groznyi aspanynda ýkrainalyq ushqyshsyz ushý apparaty bolǵan. Pýtin ushaq áýe qorǵanys zymyranynyń tikelei soqqysynan emes, jarylys kezinde shashyraǵan synyqtardan zaqymdanǵanyn málimdegen edi.
Osylaisha, Aqtaý mańyndaǵy qaiǵyly áýe apatyna qatysty másele diplomatiialyq deńgeide rettelip, taraptar ótemaqy tóleý jáne oqiǵa saldaryn jabý boiynsha kelisimge kelgen.
