AQSh-tyń jańadan sailanǵan prezidenti Donald Tramp memlekettik hatshy qyzmetine usynǵan kandidat islamdy «uly senim» dep atap, belgili bir din jáne toptarǵa qatysty jappai tyiym salýdy qoldamaitynyn málimdedi.
ExxonMobil kompaniiasynyń burynǵy basshysy Reks Tillerson bul málimdemesin 11 qańtarda senattyń syrtqy ister komitetindegi tyńdaý kezinde aitty. Sailaý kampaniiasy kezinde Tramp teraktini aldyn alý úshin musylmandardy AQSh-qa kirgizýge tyiym salýdy usynǵan.
Demokratiialyq jáne Respýblikalyq partiia ókilderiniń deni bul bastamany synaǵan.
Tillerson senat múshelerine ExxonMobil kompaniiasyn basqaryp turǵan kezde Taiaý Shyǵystaǵy jáne Aziianyń ońtústik-shyǵys bólikterindegi musylman elderin aralaǵanyn baiandap, ol “bul uly senimdi baǵalap, moiyndai bastaǵanyn” aitty.
Ol sonymen birge ekstremisterge qatysty AQSh úlken qaýip-qaterge tap bolyp otyrǵanyn, biz bul máseleni “jyly jaýyp qoia almaimyz” dedi. “Bizge qaýip-qaterdi tolyǵymen túsinip, olardyń kózin joiý úshin arnaiy baǵdarlama ázirlep, aldyn alý kerek”, - dedi ol.
