Búgin QR Mádeniet jáne aqparat ministrligi qazaqstandyq LGBT saityna tosqaýyl qoidy, – dep habarlaidy Dalanews.kz
LGBT saity bloktalǵanǵa deiin onyń basty betinde «Selftanu.kz – bul LGBTQ+ jasóspirimderine jáne ózin túsingisi keletinderge arnalǵan joba» degen saittyń sipattamasyn oqýǵa bolatyn edi.
Bul sait pen onyń mazmuny qazaqstandyqtar arasynda túrli pikir týǵyzǵany belgili. Kópshilik óz narazylyqtaryn bildirdi. LGBTQ+ jasóspirimderine arnalǵan alǵashqy veb-sait ashylǵan kúni qazaqstandyqtar dástúrli emes seksýaldyq baǵytty nasihattaýǵa qarsy petitsiia bastaǵan bolatyn.
Óz kezeginde QR Mádeniet jáne aqparat ministrligi saittyń buǵattalýyna qatysty túsinikteme berdi.
Ministrlik Selftanu.kz internet-resýrsynda júrgizilgen monitoring barysynda balalardyń densaýlyǵy men damýyna ziian keltiretin aqparatty ornalastyrýǵa qatysty zań buzýshylyqtardy anyqtaǵan.
Balalardyń quqyqtaryn qorǵaý jónindegi ýákiletti organ balalardyń psiho-jastyq erekshelikterin, olardyń teris áserinen osaldyǵyn eskerip, qazaqstandyq turǵyndar arasynda LGBT qozǵalysynyń ideialaryn taratatyn internet-resýrstarǵa qoljetimdilikti shekteý qajet dep sanady. Ministrlik aqparattyq ortany, qazaq qoǵamynyń tarihy men dástúr sabaqtastyǵy, memlekettiń mádeni qundylyqtaryn, sondai-aq balalardy durys tárbieleý máselesin jan-jaqty saraptap, osyndai sheshimge kelgenni aita ketýimiz kerek.
«Balalardy olardyń densaýlyǵy men damýyna ziian keltiretin aqparattan qorǵaý týraly» Zańynda balalarǵa tyiym salynǵan aqparat erekshe seksýaldyq jáne erotikalyq sipattaǵy, Qazaqstan Respýblikasynyń ózge de zańdarymen balalar arasynda taralýyna tyiym salynǵan málimetterdi qamtityny belgilengen.
Sonymen qatar «Bala quqyǵy týraly» zańda pornografiialyq aqparatty taratatyn, balalarǵa ziiandy áser etetin jáne quqyq buzýshylyq jasaýǵa yqpal etetin buqaralyq aqparat quraldaryn paidalaný da zańmen jaýapkershilikke tartyp, olardy taratýǵa tyiym salynatyny aitylǵan.
Osy sebepterge bailanysty ministrlik Selftanu.kz internet-resýrsyna kirýdi shekteý sharalaryn qabyldady.
Sonymen qatar ministrlik ókili atalǵan saitta zań buzýshylyqtar joiylsa, oǵan qoljetimdilik qalpyna keltiriletinin atap ótti.
