بۇگىن ق ر مادەنيەت جانە اقپارات مينيسترلىگى قازاقستاندىق لگبت سايتىنا توسقاۋىل قويدى، – دەپ حابارلايدى Dalanews.kz
لگبت سايتى بلوكتالعانعا دەيىن ونىڭ باستى بەتىندە «Selftanu.kz – بۇل LGBTQ+ جاسوسپىرىمدەرىنە جانە ءوزىن تۇسىنگىسى كەلەتىندەرگە ارنالعان جوبا» دەگەن سايتتىڭ سيپاتتاماسىن وقۋعا بولاتىن ەدى.
بۇل سايت پەن ونىڭ مازمۇنى قازاقستاندىقتار اراسىندا ءتۇرلى پىكىر تۋعىزعانى بەلگىلى. كوپشىلىك ءوز نارازىلىقتارىن ءبىلدىردى. LGBTQ+ جاسوسپىرىمدەرىنە ارنالعان العاشقى ۆەب-سايت اشىلعان كۇنى قازاقستاندىقتار ءداستۇرلى ەمەس سەكسۋالدىق باعىتتى ناسيحاتتاۋعا قارسى پەتيسيا باستاعان بولاتىن.
ءوز كەزەگىندە ق ر مادەنيەت جانە اقپارات مينيسترلىگى سايتتىڭ بۇعاتتالۋىنا قاتىستى تۇسىنىكتەمە بەردى.
مينيسترلىك Selftanu.kz ينتەرنەت-رەسۋرسىندا جۇرگىزىلگەن مونيتورينگ بارىسىندا بالالاردىڭ دەنساۋلىعى مەن دامۋىنا زيان كەلتىرەتىن اقپاراتتى ورنالاستىرۋعا قاتىستى زاڭ بۇزۋشىلىقتاردى انىقتاعان.
بالالاردىڭ قۇقىقتارىن قورعاۋ جونىندەگى ۋاكىلەتتى ورگان بالالاردىڭ پسيحو-جاستىق ەرەكشەلىكتەرىن، ولاردىڭ تەرىس اسەرىنەن وسالدىعىن ەسكەرىپ، قازاقستاندىق تۇرعىندار اراسىندا لگبت قوزعالىسىنىڭ يدەيالارىن تاراتاتىن ينتەرنەت-رەسۋرستارعا قولجەتىمدىلىكتى شەكتەۋ قاجەت دەپ سانادى. مينيسترلىك اقپاراتتىق ورتانى، قازاق قوعامىنىڭ تاريحى مەن ءداستۇر ساباقتاستىعى، مەملەكەتتىڭ مادەني قۇندىلىقتارىن، سونداي-اق بالالاردى دۇرىس تاربيەلەۋ ماسەلەسىن جان-جاقتى ساراپتاپ، وسىنداي شەشىمگە كەلگەننى ايتا كەتۋىمىز كەرەك.
«بالالاردى ولاردىڭ دەنساۋلىعى مەن دامۋىنا زيان كەلتىرەتىن اقپاراتتان قورعاۋ تۋرالى» زاڭىندا بالالارعا تىيىم سالىنعان اقپارات ەرەكشە سەكسۋالدىق جانە ەروتيكالىق سيپاتتاعى، قازاقستان رەسپۋبليكاسىنىڭ وزگە دە زاڭدارىمەن بالالار اراسىندا تارالۋىنا تىيىم سالىنعان مالىمەتتەردى قامتيتىنى بەلگىلەنگەن.
سونىمەن قاتار «بالا قۇقىعى تۋرالى» زاڭدا پورنوگرافيالىق اقپاراتتى تاراتاتىن، بالالارعا زياندى اسەر ەتەتىن جانە قۇقىق بۇزۋشىلىق جاساۋعا ىقپال ەتەتىن بۇقارالىق اقپارات قۇرالدارىن پايدالانۋ دا زاڭمەن جاۋاپكەرشىلىككە تارتىپ، ولاردى تاراتۋعا تىيىم سالىناتىنى ايتىلعان.
وسى سەبەپتەرگە بايلانىستى مينيسترلىك Selftanu.kz ينتەرنەت-رەسۋرسىنا كىرۋدى شەكتەۋ شارالارىن قابىلدادى.
سونىمەن قاتار مينيسترلىك وكىلى اتالعان سايتتا زاڭ بۇزۋشىلىقتار جويىلسا، وعان قولجەتىمدىلىك قالپىنا كەلتىرىلەتىنىن اتاپ ءوتتى.
