Halyqaralyq balalardy qorǵaý kúnine orai Prezident rezidentsiiasy barlyq oblystan kelgen 100 oqýshyǵa esigin aiqara ashty, dep habarlaidy dalanews.kz.
Aqordada pán olimpiadalarynyń jeńimpazdary men júldegerleri, oqý ozattary, shyǵarmashylyq baiqaýlardyń jáne sport saiystarynyń laýreattary qonaq boldy. Kishkentai meimandarǵa ǵimarat qurylysynyń tarihy men sáýlettik erekshelikteri týraly syr shertetin qyzyqty ekskýrsiia uiymdastyryldy.
Oqýshylar resmi qabyldaý ótetin zaldarmen, Memleket basshysynyń kitaphanasymen tanysyp, rezidentsiia aýmaǵyndaǵy baqta serýendedi. Jetkinshekter Qazaqstan tarihy týraly jan-jaqty málimet alyp, Táýelsizdik qundylyqtarynyń mańyzyna boilady. Ekskýrsiia sońynda balalarǵa Prezident atynan estelik syilyqtar tabystaldy.
