– Arystanbek Muhamediulyna qatysty 221 mln teńgelik biýdjet aqshasyn jymqyrýǵa bailanysty iske úkim shyqty. Qazir basqa qosymsha epizodtar bar: olar da biýdjet qarajatyn iri kólemde jymqyrý jáne joǵary sheberliktegi sport mektebin zańsyz jekeshelendirýge qatysty ister. Odan bólek, qonaq úidi reiderlik jolmen basyp alý, para berýge tyrysý isi de bar. Osy isterdiń bári sot qaraýynda, – dedi Arman Tileýkenov.
Eske sala keteiik, byltyr jyl sońynda Astana sotynda Arystanbek Muhamediulyna qatysty jańa sot protsesi boiynsha aldyn ala tyńdaýlar ótken edi. Eki epizod bir óndiriske biriktirilgen.
Osylaisha, birinshisi "Altyn adamnyń álem murajailary arqyly sherýi" kórmesin ótkizýge bailanysty jańa jaǵdailar tekserilip jatyr. Ekinshi is - Astanadaǵy "Diplomat" qonaq úiiniń "reiderligi" jóninde qozǵalǵan. Aiyptaý aktisine sáikes, sottalýshylar 1.5 mlrd teńge jymqyrdy dep kúdikke ilinip otyr. Qorǵaýshy tarap bul aktimen kelispeitinin málimdedi, óitkeni kiná rastalmaǵanyn alǵa tartady.
Eske salaiyq, eks-ministr Arystanbek Muhamediuly byltyr QR Qylmystyq kodekstiń 28-baby 3-bóligi jáne 189-bóligi 4-tarmaǵy 2-tarmaǵy boiynsha quqyq buzýshylyq jasaǵany úshin kináli dep tanylyp, 8 jylǵa bas bostandyǵynan aiyryldy.
Arystanbek Muhamediulymen qatar Ulttyq mýzei basshysy bolǵan Almas Nurazhan, «Eksponat» merdiger uiym direktorynyń orynbasary Azamat Kóshenov pen osy kompaniianyń esepshisi Aiym Sádýaqasova 7 jylǵa sottaldy. Olar qylmystyq zańbuzýshylyqqa qatysty degen aiyppen kináli dep tanyldy. Sot sheshimimen 6 jasar qyzy bar, jalǵyzbasty Aiym Sádýaqasovanyń balasy Sádýaqasovanyń týystarynyń birine nemese qamqorlyq mekemesine tapsyrylatyn boldy.
Arystanbek Muhamediuly 2022 jyldyń 28 mamyrynda qamaýǵa alynǵan bolatyn. Tergeý «Altyn adamnyń álem murajailary boiynsha sherýi» halyqaralyq kórmesin ótkizýge, sondai-aq «Qazaqstannyń ulttyq kieli nysandary men mýzei qorlaryn jalpymemlekettik fotogrammetriialyq 3D-skanerleý» jáne «Qazaqstan Respýblikasynyń Ulttyq tsifrlyq kinokollektsiiasyn tsifrlandyrý» jobalaryna bólingen biýdjet qarajatyn urlaý faktileri boiynsha júrgizildi. Budan basqa, A. Muhamediulynyń Mádeniet jáne sport ministri laýazymynda bolǵan kezinde týystarynyń jáne úlestes tulǵalarynyń menshigine «Sý jáne qoldanbaly sport túrleri boiynsha respýblikalyq joǵary sport sheberligi mektebi» RMQK, «Qazaq entsiklopediiasy» AQ jáne «Qazaq ǵylymi-zertteý mádeniet institýty» JShS zańsyz berýge qatystylyǵy tekserildi.
