Prezident Qasym-Jomart Toqaev Túrkiiaǵa resmi saparmen bardy, dep habarlaidy dalanews.kz.
Memleket basshysyn Ankara qalasyndaǵy Etimesgýt áýejaiynan Túrkiia Prezidenti Rejep Taiip Erdoǵan kútip aldy.
Qazaqstan men Túrkiia prezidentteri keńeitilgen quramda kelissóz júrgizdi. Prezidentterdiń kelissózi eki eldiń resmi delegatsiia músheleriniń qatysýymen odan ári jalǵasty.
Qasym-Jomart Toqaev baýyrlas eldiń Respýblika kúni qarsańyndaǵy júzdesý tereń simvoldyq mánge ie ekenine nazar aýdaryp, Túrkiia Prezidenti men barsha túrik halqyn ulyq merekemen quttyqtady.
"Sizdiń parasatty basshylyǵyńyzdyń ári kóregen saiasatyńyzdyń arqasynda Túrkiia aýqymdy reformalardy tabysty júzege asyryp jatyr. Elińiz saiasi jáne ekonomikalyq turǵydan jańǵyryp, qarqyndy damyp keledi. Túrkiianyń abyroi-bedeli jyldan jylǵa arta túsýde. Biz Ózińizdi álemdegi asa yqpaldy kóshbasshylardyń biri retinde bilemiz. Sizdiń ashyq ári batyl ustanymyńyz, beibitshilik pen ádildik jolyndaǵy kúsh-jigerińiz jahandyq deńgeide moiyndalyp otyr. Túrik halqynyń mártebesi aldaǵy ýaqytta da asqaqtai beredi dep senemin. Qazaq eli Túrkiiany árqashan qoldaidy jáne aǵaiyn jurttyń árbir jetistigine shyn júrekten qýanady", – dedi Qasym-Jomart Toqaev.
Qazaqstan Prezidenti ózara bailanystardy odan ári nyǵaitýǵa erekshe mán beretinin atap ótti.
"Qazaq-túrik yqpaldastyǵy tereńnen tamyr tartady. Tarihymyz – ortaq, tilimiz ben dilimiz – bir, dástúrimiz – uqsas. Eki eldiń saiasi yntymaqtastyǵy ózara senimge jáne myzǵymas dostyqqa negizdelgen. Memleketterimizdiń arasynda sheshimin tappaǵan eshqandai másele joq. Biz ekijaqty jáne halyqaralyq deńgeide bir-birimizge únemi qoldaý kórsetip júrmiz. Saýda-ekonomika salasyndaǵy qarym-qatynasymyz da kúsheiip keledi. Túrkiia – Qazaqstannyń eń iri bes saýda seriktesiniń biri. Buǵan qosa, Anadolydaǵy aǵaiyn ulttyq ekonomikamyzǵa kólemdi qarjy salǵan basty 10 investordyń qataryna kiredi. Qazaqstanda birqatar túrik kompaniialary tabysty jumys istep jatyr. Biz túrik baýyrlarymyzǵa jan-jaqty qoldaý kórsetip, olardyń kásip júrgizýi úshin qolaily jaǵdai jasaýǵa tyrysamyz", – dedi Memleket basshysy.
Qasym-Jomart Toqaevtyń aitýynsha, Rejep Taiip Erdoǵannyń biyl mamyr aiynda Qazaqstanǵa memlekettik sapary jemisti bolyp, birqatar mańyzdy ýaǵdalastyqqa qol jetkizildi.
Sapar aiasynda eki el arasyndaǵy Strategiialyq yntymaqtastyq keńesiniń altynshy otyrysy uiymdastyryldy. Saýda-ekonomikalyq, investitsiialyq jáne mádeni-gýmanitarlyq salalarda aýqymdy jobalar tabysty júzege asyrylýda.
Eń bastysy, qarym-qatynas máńgilik dostyq jáne keńeitilgen strategiialyq seriktestik deńgeiine kóterildi.
"Seriktestigimizdi odan ári damytý bárimizdiń múddemizge sai keledi. Erteń Ózińizben birge Túrki memleketteri uiymynyń 13-sammitine qatysamyz. Jaqyn arada Antaliiada SOR31 klimattyq forýmy ótedi. Men osy bedeldi basqosýǵa qatysýdy josparlap otyrmyn. Munyń bári ekijaqty jáne kópjaqty bailanysymyzdy damytýǵa tyń serpin beretini sózsiz", – dedi Qazaqstan Prezidenti.
Túrkiia Prezidenti Qasym-Jomart Toqaevty jáne baýyrlas qazaq halqyn Respýblika kúnimen quttyqtady. Rejep Taiip Erdoǵan jaqynda Ankarada qazaq memlekettiliginiń tarihyna arnalǵan "Quryltai fenomeni" kitabynyń tusaýkeseri ótkenin aitty. Budan bólek, "Naýryz – túrki áleminiń ortaq murasy" kitaby qazaq tiline aýdaryldy.
"Biyl mamyr aiynda Astanaǵa jasaǵan saparym barysynda birqatar mańyzdy qujatqa, sonyń ishinde Máńgilik dostyq jáne keńeitilgen strategiialyq seriktestik týraly deklaratsiiaǵa qol qoidyq. Strategiialyq yntymaqtastyq keńesiniń kelesi otyrysynda ózara qarym-qatynasty naqty qadamdarmen bekite túsemiz. Biz taýar ainalymyn 15 milliard dollarǵa jetkizip, investitsiialyq bailanystardy jandandyrýǵa niettimiz", – dedi Túrik eliniń basshysy.
Kelissóz barysynda eki el basshylary kólik-logistika, energetika, jasandy intellekt, aýyl sharýashylyǵy, qorǵanys ónerkásibi jáne mádeni-gýmanitarlyq baǵyttaǵy yqpaldastyq máselelerin talqylady.
