Premer-ministrdiń orynbasary, ulttyq ekonomika ministri Serik Jumanǵarin Magnum daýyna qatysty pikir bildirdi, dep habarlaidy Dalanews.kz.
Serik Jumanǵarin bul jaǵdai týraly keshe ǵana bilgenin aitty.
"Áleýmettik jelini qarap otyrýǵa ýaqyt joq. Qazirgi ýaqytta syrtqy jaǵdai, salyq kodeksine bailanysty onsyz da jumys kóp. Jalpy aitqanda qazaq tili halqymyzdyń tiregi. Elimizdiń bolashaǵynyń negizi. Qazaq tiline biraz jaǵdai jasalǵan. Meeiń oiymsha, bul eki jeke tulǵanyń arasynda bolǵan turmystyq jait. Biraq bizge úlken sabaq boldy bul. Til, ult máselesin talqylaǵanda, áleýmettik jelide jazǵanda abailaý kerek. Tatý bolýymyz kerek. Bul máseleni ózderi sheshedi dep oilaimyn. Jeke adamdardyń arasynda bolǵan oqiǵa. Meniń bilýimshe, Magnum-nyń burynǵy qyzmetkeri jaqsy jumysqa ornalasqan. Klienttiń oǵan eshqandai shaǵymy joq qazir. Áńgimeni toqtatý kerek dep esepteimin", deidi Jumanǵarin.
Oqiǵa neden bastaldy?
Áleýmettik jelilerde Magnum sýpermarketter jelisiniń kýreriniń jumystan shyǵarylýy qoǵamda úlken talqyǵa tústi. Bul jaǵdai kýrerdiń klientten qazaq tilinde sóileýin suraýynan keiin bolǵan.
Klient Asylhan esimdi azamattyń aitýynsha, ol Magnum-nan azyq-túlikke tapsyrys bergen kezde, kýrer odan qazaqsha sóileýdi talap etken. Keiin bul oqiǵa áleýmettik jelide jariialanyp, nátijesinde kýrer jumystan qýylǵan.
Magnum kompaniiasy ne dedi?
Magnum kompaniiasy bul jaǵdaiǵa qatysty resmi málimdeme jasap, kýrerdiń jumystan shyǵarylýy tek til máselesine bailanysty emes ekenin aitty. Olardyń málimetinshe, kýrer klienttermen birneshe ret dóreki sóilesken.
Kompaniia barlyq tutynýshylarǵa birdei qurmetpen qaraitynyn jáne qyzmet kórsetý mádenietin joǵary baǵalaitynyn jetkizdi.
Qoǵamdyq reaktsiia jáne boikot jariialaý
Bul jaǵdai qoǵamda úlken narazylyq týdyrdy. Kóptegen qazaqstandyqtar Magnum jelisine boikot jariialaitynyn málimdedi. Áleýmettik jeli qoldanýshylary kompaniianyń áreketin synǵa alyp, memlekettik tilge degen qurmettiń tómendigin atap ótti.
