Balqash kóliniń jaǵalaýyn damytýdyń Bas jospary 2013 jyly jasalǵan. Jiynda sol qujat jobasyna sáikes kól jaǵalaýyna injenerlik infraqurylymdar júrgizý, elektr jelisin tartý, jol salý máseleleri týraly sóz boldy.
Máselen, jobaǵa sáikes 15 shaqyrym avtokólik jolyn tóseý, 50 shaqyrym sý qubyry júiesin salý, 40 shaqyrym káriz júiesin júrgizý, 55 shaqyrym elektr jelilerin tartý josparlanǵan.
Jobalaýshy mekeme tarapynan elektr jelisin Tentek, Kókterek, Lepsi qosalqy stansalary arqyly tartý usynylǵan. Alaida Amandyq Batalov bul jumysty eki kezeńge bólip, alǵashqy kezeńin eń jaqyn ornalasqan Lepsi qosalqy stansasy arqyly tartý qajettigin aitty. Sol siiaqty jaǵalaýǵa aparatyn joldarmen qatar radialdy joldar salýdy da qarastyrýdy tapsyrdy.
Sonymen qatar taý týrizmine investorlardyń qyzyǵýshylyǵyn arttyrý úshin jol jóndeý jumysyna oblys ákimi qoldaý bildiretinin aitty. Aýdan ákimine qurylys jumystaryna ketetin barlyq esep-qisapty anyqtap ákelýdi tapsyrdy.
– Balqashqa qatysty arnaiy biznes-forým ótkizý kerek. Týristik aimaq retinde Balqashty bári biledi. Biraq biz ony infraqurylymy tartylǵan, jaǵdai jasalǵan kól jaǵalaýy retinde kásipkerlerge tanystyrýymyz kerek, – dedi A.Batalov.
