Búgin Májiliste ótken «AMANAT» partiiasy fraktsiiasynyń jiynynda depýtattar óńirlerdegi jazǵy saparlary kezinde sailaýshylar tarapynan kóterilgen máselelerdi talqylady. Kóp aimaqta jii kóterilgen máselelerdiń qatarynda ýaqyt beldeýin qaita qaraý taqyryby boldy. Talqylaý nátijesinde qoǵamdyq aýqymdy usynysty eskere otyryp, atalǵan máseleni múddeli memlekettik organdar men sarapshylar qoǵamdastyǵy ókilderiniń qatysýymen ótetin Májilistiń aldaǵy jalpy otyrystarynyń birinde qaraý týraly sheshim qabyldandy.
Sóz basynda Májilis Spikeri, «AMANAT» partiiasynyń Tóraǵasy Erlan Qoshanov depýtattardyń óńirlerge sapary kezinde jinalǵan halyqtyń barlyq problemalyq máselesi júielenip, ony sheshý úshin Úkimetke joldanatynyn atap ótti. Bul jumystyń qorytyndysy jyl sońynda Májilistiń jalpy otyrystarynyń birinde ashyq qaralady.
Buǵan qosa, bastamashyl azamattar toby osy másele boiynsha tiisti petitsiia jariialap, ol qoǵamda qyzý talqyǵa tústi. Jýyrda ótken Májilistiń plenarlyq otyrysynda bul máseleni «AMANAT» fraktsiiasynyń múshesi, Shyǵys Qazaqstan oblysynan sailanǵan birmandatty depýtat Luqbek Týmashinov kóterdi. Alaida, Saýda jáne integratsiia ministriniń bul másele úsh jyldan keiin qaralady degen jaýabyn halyq qalaýlylary jetkiliksiz dep tanydy.
Osy taqyryp tóńiregindegi qoǵamdyq úlken rezonansty eskere otyryp, talqylaý nátijesinde fraktsiia depýtattary múddeli memlekettik organdardyń, ǵalymdardyń, sarapshylardyń jáne óńirlerdegi ókilderdiń qatysýymen aldaǵy ýaqytta ótetin Májilistiń jalpy otyrystarynyń birinde ýaqyt beldeýin aýystyrý máselesin ashyq qaraý týraly sheshim qabyldady. Otyrys qorytyndysy boiynsha naqty usynystar ázirlep, ony Úkimetke usyný josparlanýda.
«AMANAT» partiiasynyń baspasóz qyzmeti
