Búgin Májiliste ótken «AMANAT» partıasy fraksıasynyń jıynynda depýtattar óńirlerdegi jazǵy saparlary kezinde saılaýshylar tarapynan kóterilgen máselelerdi talqylady. Kóp aımaqta jıi kóterilgen máselelerdiń qatarynda ýaqyt beldeýin qaıta qaraý taqyryby boldy. Talqylaý nátıjesinde qoǵamdyq aýqymdy usynysty eskere otyryp, atalǵan máseleni múddeli memlekettik organdar men sarapshylar qoǵamdastyǵy ókilderiniń qatysýymen ótetin Májilistiń aldaǵy jalpy otyrystarynyń birinde qaraý týraly sheshim qabyldandy.
Sóz basynda Májilis Spıkeri, «AMANAT» partıasynyń Tóraǵasy Erlan Qoshanov depýtattardyń óńirlerge sapary kezinde jınalǵan halyqtyń barlyq problemalyq máselesi júıelenip, ony sheshý úshin Úkimetke joldanatynyn atap ótti. Bul jumystyń qorytyndysy jyl sońynda Májilistiń jalpy otyrystarynyń birinde ashyq qaralady.
Osy oraıda, birqatar depýtat Shyǵys Qazaqstan, Aqmola, Pavlodar, Soltústik Qazaqstan, Abaı jáne Jetisý oblystarynyń turǵyndaryn tolǵandyrǵan eń ózekti máselelerdiń qatarynda UTC+5 ýaqyt formatyna kóshý ekenin atap ótti. Kezdesýler barysynda azamattar depýtattarǵa dál osy máselege baılanysty týyndaǵan qolaısyzdyqtar týraly kóp dálel keltirdi – tún ortasynda tań atady, ádettegiden áldeqaıda erte qarańǵy túsedi. Munyń bári adamdardyń kúndelikti ómirine keri áser etedi.
Buǵan qosa, bastamashyl azamattar toby osy másele boıynsha tıisti petısıa jarıalap, ol qoǵamda qyzý talqyǵa tústi. Jýyrda ótken Májilistiń plenarlyq otyrysynda bul máseleni «AMANAT» fraksıasynyń múshesi, Shyǵys Qazaqstan oblysynan saılanǵan birmandatty depýtat Luqbek Týmashınov kóterdi. Alaıda, Saýda jáne ıntegrasıa mınıstriniń bul másele úsh jyldan keıin qaralady degen jaýabyn halyq qalaýlylary jetkiliksiz dep tanydy.
talǵan másele boıynsha depýtattar Luqbek Týmashınov, Rınat Zaıtov, Iýlıa Kýchınskaıa, Dáýlet Muqaev, Nurtaı Sabılánov, Ashat Aımaǵambetov, Dúısenbaı Turǵanov jáne ózge de azamattar pikir bildirdi.
Osy taqyryp tóńiregindegi qoǵamdyq úlken rezonansty eskere otyryp, talqylaý nátıjesinde fraksıa depýtattary múddeli memlekettik organdardyń, ǵalymdardyń, sarapshylardyń jáne óńirlerdegi ókilderdiń qatysýymen aldaǵy ýaqytta ótetin Májilistiń jalpy otyrystarynyń birinde ýaqyt beldeýin aýystyrý máselesin ashyq qaraý týraly sheshim qabyldady. Otyrys qorytyndysy boıynsha naqty usynystar ázirlep, ony Úkimetke usyný josparlanýda.
«AMANAT» partıasynyń baspasóz qyzmeti
