QR Aýyl sharýashylyǵy ministri Erbol Qarashókeev jerdi utymdy ári tiimdi paidalaný jóninde baiandama jasady. Esterińizge sala keteiik, 2022 jylǵy 3 qańtarda Memleket basshysy paidalanylmaityn aýyl sharýashylyǵy jerlerin májbúrlep alyp qoiý merzimin 2 jyldan 1 jylǵa deiin qysqartqan zańǵa qol qoidy. Kosmomonitoring arqyly memlekettik baqylaýdyń jańa tetikteri engizildi.
Paidalanylmai jatqan aýyl sharýashylyǵy jerlerine salyq mólsherlemesi eki ese ósti. Ministrdiń aitýynsha, barlyq óńirlerde derlik jaiylym jerler óte ózekti másele bolyp otyr, alaida 2019-2021 jyldary atqarylǵan jumystardyń nátijesinde 8,1 mln gektar paidalanylmaityn nemese maqsatty paidalanylmai jatqan aýyl sharýashylyǵy jerleri anyqtaldy.
Tiisti sharalardan keiin osy kólemnen 3,4 mln ga jer telimin burynǵy menshik ieleri igere bastady.
2,1 mln ga jer memleket menshigine qaitaryldy. Búginde 2,6 mln ga jergilikti atqarýshy organdardyń qaraýynda. Sonymen qatar 2021 jyly aýyl halqyna mal jaiý úshin jaiylym jerdiń qajettiligi 21 mln ga-dan 14 mln ga-ǵa deiin, onyń ishinde uiymdastyrylǵan sharýashylyqtarmen memorandýmdar jasasý jáne eldi mekenderdiń shekarasyn keńeitý esebinen qysqartyldy.
– Memleket basshysynyń tapsyrmasyn sapaly ári ýaqytyly oryndaý qajet. Aýyl sharýashylyǵy ministrligine jumysty jandandyrýdy tapsyramyn. Paidalanylmai jatqan aýyl sharýashylyǵy maqsatyndaǵy jerler naqty jumys isteitinderge berilýi tiis, – dedi Álihan Smaiylov.
Sondai-aq Komissiia otyrysynda qarjy vitse-ministri D. Janalinov jáne Básekelestikti qorǵaý jáne damytý agenttiginiń tóraǵasy S. Jumanǵarin ekonomikany monopoliiasyzdandyrý máselesi týraly baiandady.
QR Premer-Ministri Qarjy ministrligine múddeli memlekettik organdarmen birlesip, keiin kezekti otyrystarda qaraý úshin negizsiz jekeshelendirilgen obektilerdi qaitarý tetikteri boiynsha taldaý júrgizip, kelisilgen usynystar ázirleýdi tapsyrdy.
