Óz jubaiyn óltirgeni úshin sottalǵan burynǵy ministr Qýandyq Bishimbaev aliment tólemderin azaitý úshin ózine tiesili múlikti úshinshi tulǵalardyń atyna jazyp bergen. Bul qadam onyń úsh balasyna tólenetin aliment mólsherin tómendetýge baǵyttalǵan edi. Alaida bul áreketi ózine qarsy jumys istep, sottyń nazarynan tys qalmady, dep habarlaidy Dalanews.kz.
Nazym Qaharmannyń múddesin qorǵap júrgen advokat Bibinur Muratovanyń aitýynsha, bul jaǵdai 2020 jyly bastalǵan. Sol jyly Bishimbaev pen onyń burynǵy jubaiy úsh ortaq balasyna aliment tóleý týraly kelisimge kelgen.
Alaida arada birneshe jyl ótken soń, burynǵy ministr kenetten sotqa júginip, óziniń qarjylyq jaǵdaiy ózgergenin aityp, aliment mólsherin azaitýdy suraǵan.
“Zańnama boiynsha, materialdyq jaǵdaidyń ózgerýi aliment kólemin qaita qaraýǵa negiz bola alady. Biraq bul – mindetti túrde ózgertý kerek degen sóz emes. Sot barysynda Bishimbaevtyń áli de múlki bary anyqtaldy. Ol qylmystyq is qaralyp jatqanda bul múlikterdi basqa adamdardyń atyna syiǵa tartý shartymen rásimdegen”, – dedi advokat Muratova.
Iaǵni, Bishimbaev qaǵaz júzinde «kedeilenip», balalary aldyndaǵy mindettemelerden jaltarýǵa tyrysqan. Biraq bul qýlyǵy sotqa júrmedi.
“Ol óz ótinishinde aliment mólsherin birneshe ese azaitýdy surady. Dál somany jariialai almaimyn, biraq ótinishi tym úlken jeńildikke baǵyttalǵan bolatyn”, – dep túsindirdi advokat.
Sot Bishimbaevtyń áreketin óz balalarynan alimenttik jaýapkershilikten jaltarý áreketi dep tanyp, talap-aryzyn qanaǵattandyrmady. Endi burynǵy ministr barlyq úsh balasy kámelet jasqa tolǵanǵa deiin tolyq kólemde aliment tóleýdi jalǵastyrady.
Eske salaiyq, buǵan deiin Qýandyq Bishimbaevtyń burynǵy jubaiy Nazym Qaharman ony ata-ana quqyǵynan aiyrýdy talap etip, Joǵarǵy sotqa júgindi.
Atalǵan aryz boiynsha Joǵarǵy sot ázirge sheshim shyǵarǵan joq.
Sonymen qatar sáýir aiynda Bishimbaev aliment tóleýden bas tartqysy kelgeni belgili boldy. Ol tabys kózi joq ekenin alǵa tartyp, aliment týraly buryn jasalǵan kelisimdi buzýǵa nietti.
"Bishimbaevtar tarapynan aliment tólemin azaitý maqsatynda kelisimdi qaita qaraý týraly ótinish tústi. Aqsha joq degen ýáj aitty. Qazir is qaralyp jatyr. Árine, biz munymen kelispeimiz", – dedi Nazym Qaharman.
Eske salaiyq, buǵan deiin Qýandyq Bishimbaevtyń burynǵy áieli Nazym Qaharman Bishimbaevtyń otbasy balalarǵa aliment tóleýden bas tartqanyn jetkizgen edi. Aqparatty Tengrinews.kz jazdy.
Onyń sózinshe, aliment únemi keshiktirilip tólengen, al aliment týraly kelisimde qarastyrylǵan keibir shyǵyn múldem ótelmegen.
"Byltyr demalys úshin eshqandai aqsha tólenbedi. Psihologtyń qyzmetteri úshin de aqy tólenbedi, biraq biz oǵan birneshe ret júgindik. Men tólegen barlyq somany Ǵazymjanov myrzaǵa jiberdim (Qýandyq Bishimbaevtyń advokaty - esk.), biraq olar muny elemedi. Densaýlyq týraly aitpai-aq qoiaiyn, dárigerge kóringenimiz, dárýmender, dári-dármekter tólenbedi", - dedi ol.
Ol 2020 jyly ajyrasý kezinde aliment týraly kelisim jasalǵanyn jetkizdi. Onyń aitýynsha, Qýandyq Bishimbaev aldymen qarjylyq jaýapkershilikti óz moinyna alýǵa daiyn ekenine sendirgen, biraq keiin bul týraly onyń advokatyna únemi eske salyp otyrýǵa týra kelipti.
"Naýryzda aliment tólenbedi. Azdy-kópti júieli túrde tólemder byltyr qarasha-jeltoqsanda ǵana túse bastady", - dedi Nazym Qaharman.
