«Ulttyq kinony qoldaý memlekettik ortalyǵy» KEAQ Sh.Aimanov atyndaǵy «Qazaqfilm» ulttyq kinostýdiiasy animatorlarynyń «Altyn adam» animatsiialyq filmine qatysty máselesine resmi jaýap berdi, - dep habarlaidy Dalanews.kz.
Atalǵan animatsiialyq joba qazaq úshin qadirli «Altyn adamnyń» rýhani mańyzyn ashyp kórsetýdi maqsat etti. Joba «Ulttyq kinony qoldaý memlekettik ortalyǵyna» 2020 jyly usynylyp, bastalǵan. Jalpy quny - 378 mln teńge. Kelisimshart boiynsha kinojoba 2021 jyly aiaqtalýy tiis bolatyn. Biraq oryndaýshy mindettemelerdiń údesinen shyqpai, jumysty tolyq aiaqtamaǵan jáne filmdi belgilengen ýaqytta ótkizbegen.
Osylaisha, jobany júzege asyrý merzimi josparlanǵan 2020-2021 emes, 2020-2023 jyldar aralyǵynda sozyldy. Júzege asyrý merzimi uzarǵannan keiin joba 2023 jyly naqty ári tolyqqandy aiaqtalýy tiis bolatyn.
"Alaida, 2023 jyldyń sońynda da oryndaýshy Saraptama keńesi engizgen 126 eskertýdi elemegeni anyqtaldy. Osyǵan bailanysty «Ulttyq kinony qoldaý memlekettik ortalyǵy» qalyptasqan jaǵdaidy nazarǵa ala otyryp, jobanyń úsh jylǵa deiin sozbalańǵa salynýy týrasynda bir toqtamǵa kelýi tiis boldy.
Oryndaýshyǵa atqarylǵan jumys úshin jalpy quny 294 mln teńge tólendi. Alaida, qoldanystaǵy zańnamaǵa sáikes, aiaqtalmaǵan jobalarǵa memleket qarjy bólýge qaýqarsyz ekenin aita ketken jón. Osyǵan bailanysty qalǵan 84 million teńge respýblikalyq biýdjetke qaitaryldy. Sondai-aq, 2023 jyldyń sońynda animatsiialyq joba tapsyrylmaǵandyqtan «Ulttyq kinony qoldaý memlekettik ortalyǵy»sotqa shaǵym túsirýge májbúr boldy", - deidi ortalyq ókilderi.
«Ulttyq kinony qoldaý memlekettik ortalyǵynyń» Basqarma tóraǵasy Qurmanbek Jumaǵali áleýmettik jelidegi postynda bul máselege qatysty pikir bildirgen bolatyn.
«Qazaqfilm» tizginindegi Azamat Satybaldymen bir ai buryn atqarýshylyq is júrgizý sheńberinde mediativtik kelisim jasaýǵa ýaǵdalastyq» dedi ol jazbasynda.
Endigi kezekte «Qazaqfilmniń» jobaǵa jaýapty ujymy filmdi ózara kelisim arqyly aiaqtap, «Altyn adam» animatsiialyq filmin prokatqa shyǵarady. Odan túsken taza tabystyń 20%-y Kino ortalyǵyna aýdarylsa, qalǵan 80%-y «Qazaqfilmniń» úlesinde qalady. Osylaisha «Qazaqfilm» ulttyq kinostýdiiasy atalǵan jobanyń túsirilim toby aldyndaǵy bereshegin óteidi.
Aita ketý qajet, memlekettik qarjylandyrýdy usynatyn biryńǵai operator retindegi «UKQMO» qyzmeti ulttyq kinematografiiany qarjylai qoldaýǵa jáne «UKQMO» jarǵysyna sáikes, ónimderdiń sapaly shyǵýy men bólingen qarjynyń maqsatty jumsalýyn qadaǵalaýǵa qurylǵan. Osyǵan bailanysty barlyq saýaldar quqyqtyq negizde jáne Qazaqstan Respýblikasynyń zańnamasyna sai sheshimin tabady.
