Almatyda TJM qyzmetkerleri tútin basqan úiden 127 adamdy qutqardy, dep habarlaidy dalanews.kz.
Bostandyq aýdany Abai dańǵyly boiyndaǵy 16 qabatty turǵyn úidiń 9-qabatynda ornalasqan páterde jihaz janǵan. Qutqarýshylar oqiǵa ornyna shaqyrtýdyń joǵary dárejesi boiynsha jiberilgen.
Alǵashqy órt sóndirý bólimsheleri jetken kezde kireberisti qoiý tútin basqany anyqtalǵan. TJM qyzmetkerleri turǵyndardy dereý evakýatsiialaýǵa kirisken.
"Oqiǵa ornynda jedel órt sóndirý shtaby quryldy. Gaz-tútinnen qorǵaý qyzmetiniń býyndary turǵyndardy qutqarý jáne evakýatsiialaý jumystaryna jiberildi. Jedel qabyldanǵan sharalar nátijesinde tútin basqan jerden baspaldaq arqyly 42 adam evakýatsiialandy, sonymen qatar, qutqarý qalpaqtarynyń kómegimen 85 adam, sonyń ishinde 4 bala qutqaryldy", - dep jazylǵan habarlamada.
Órt jedel sóndirilgen. Zardap shekkender týraly aqparat túspegen.
