Bul týraly jýrnalisterge qor belsendisi, qoǵam qairatkeri, Independ Digital Agency basshysy Rafael Gasanov aitty.
Belsendiniń aitýynsha, qazirdiń ózinde 100 azamat baqylaýshy bolýǵa niet bildirgen.
– Baqylaý úrdisin júrgizý úshin ádette bizge 500-600-dei adam qosylady, ótken referendýmda da, ótken Májilis sailaýynda da solai boldy, bul joly baqylaýshylar odan kem bolmaidy dep senemiz, – dedi qoǵam qairatkeri.
Rafael Gasanov málimdegendei, jaqyn arada baqylaýshylar mektebi óz jumysyn bastamaq, belsendiler onyń ashylǵany týraly áleýmettik jelilerdegi paraqshalarynda habarlaidy. Dárisker retinde sailaý ýchaskelerinde jumys tájiribesi bar volonterler qatysady.
Eriktilermen qosa zańgerler de shaqyrylady, olar bolashaq baiqaýshylardy sailaý zańnamasynyń negizderimen tanystyrady. Barlyq belsendiler anyqtamalyq ádebiettermen, atap aitqanda, «baqylaýshy dápterimen» qamtamasyz etiledi, bul olarǵa sailaý ýchaskeleri men sailaý barysyn monitoringileý men baqylaý kezinde quqyqtyq resýrs retinde qajet bolady.
Rafael Gasanov tujyrymdaǵandai, «Qoǵamdyq pikir» qorynyń baqylaýshylary sailaý ýchaskeleriniń sailaýǵa daiyndyǵyn, atap aitqanda, olardyń qajetti qural-jabdyqtarmen jáne erekshe qajettilikteri bar adamdar úshin infraqurylymmen qamtamasyz etilýin tekseredi.
Sailaý kúni sailaý ýchaskelerine baiqaýshylar bekitilip, olar monitoring júrgizip, sailaý barysyn baqylaidy. Sondai-aq qoǵamdyq belsendiler sapynan mobildi toptar qurylady. Olar daýly máseleler, zań talaptarynyń saqtalýy, daýys berý erejeleri boiynsha suraqtar týyndaǵan jaǵdaida jedel túrde sailaý ýchaskelerine barady.
Sailaý kúni qoǵamdyq belsendiler jarty saǵat saiyn sailaý naýqany barysy týraly esep daiyndaidy. Olar óńirlerdegi ókildermen onlain rejimde pikir, derek almasady, bul búkil eldegi daýys berý barysyna taldaý jasaýǵa múmkindik beredi.
Rafael Gasanov bul jumystardyń qorytyndysy boiynsha qoǵamdyq belsendiler arnaiy qarar daiyndaitynyn aitty. Bul qujatta olar ózderiniń barlyq baqylaý jumystarynyń nátijelerin kórsetedi. Qarar OSK-ǵa jiberiledi.
Brifingte Rafael Gasanovpen qatar basqa da qoǵamdyq belsendiler – jýrnalist, bloger, «Anyq Time» telebaǵdarlamasynyń júrgizýshisi Maqsat Mamadiiarov jáne t.b. sóz sóiledi. Olar kámelettik jasqa tolǵan jastardy baqylaý protsesine belsendi qatysýǵa shaqyrdy.
