Almatyda 3 adamnyń ólimine ákep soqqan avtobýs apatyna qatysty sot otyrysy ótip jatyr, - dep habarlaidy Dalanews.kz.
Sot jaryssózinde Darhan Ahmedjanov sońǵy sózin aitty. Sot keńesý bólmesine ketti.
"Sot aktisi 26 sáýirde saǵat 16.30-da jariialanady", - dep jazylǵan Joǵarǵy sot málimetinde.
Sottalýshy buzaqylyq jasaǵany jáne abaisyzda úsh adamnyń ólimine ákep soqtyrǵan kóliktiń qaýipsiz jumysyn qamtamasyz etý erejelerin buzǵany úshin aiyptalyp otyr.
Eske salaiyq, 2023 jylǵy jeltoqsanda Almatyda avtobýs aialdamada turǵan bir top adamdy qaǵyp ketken edi. Saldarynan 3 adam mert boldy.
Keiin qoǵamdyq kólik júrgizýshisin urǵan er adam ustaldy. Bul derek negizinde QR QK-niń 345-baby 3-bóligi boiynsha sotaldy tergeý de bastaldy.
Al avtobýs júrgizýshisi keshirim surady.
"Men osy qaiǵyly jaǵdaiǵa bailanysty qaza tapqan marqumdardyń týystaryna kóńil aitamyn. Meniń tarapymnan eshqandai ádeii osylai isteiin degen niet bolǵan joq. Mundaidy jaýyma da tilemespin. Ózimdi kináli sanamaimyn. Jolaýshy esimnen tanyp qalǵansha urdy.
Aýrýhanada jatqanymda tergeýshi keldi. Bireýi er, ekinshisi áiel. Siz zardap shegýshisiz. Kináńiz joq dep aitqan. Endi jazylyp shyqqanda aýyr bap boiynsha aiyptap jatqanyn bildim. Ózim arendaǵa úi jaldap turamyn. Eki balam bar. Solar úshin eńbek etip kelemin. Meniń jumysyma eshkim shaǵymdanbaǵan. Maǵan osyndai qylmystyq kodeks boiynsha ne úshin aýyr aiyp taǵyp jatqanyn túsinbeimin. Eger soqqy almaǵanymda, mundai jol apatyna jol bermes edim. Ádildik bolady dep úmittenemin", – deidi Ermek Shókebaeva.
Sonymen qatar, Almatydaǵy avtobýs apatynan qaza tapqandardyń jaqyndary buǵan deiin de ótemaqy talap etti.
Avtobýs apatynan qaza tapqan erli-zaiypty Talap Qosymov pen Gúljahan Jetpisbaevanyń týysy Súiinbai Ońalbekuly park ókilderiniń bir aptadan keiin ǵana kóńil aitqanyn jetkizdi. Olardyń aitýynsha, tipti sol kezde de kómek kórsetý týraly jaq ashpaǵan. Al bul otbasynyń artynda tórt balasy qalǵan. Turyp jatqan baspanalary da nesiege alynǵan eken.
"Bankten 17 million, qalǵanyn ózderi aýyldaǵy úileri men kólikterin satyp páter aldy. Sol banktegi aqshasy jabylsa, balalaryna baspana qalar edi. Endi avtobýs parki jaǵynan úmit kútip otyrmyz. Úmitimizdi aqtaityn shyǵar degen oidamyz", – dedi Súiinbai Ońalbekuly.
