2025 jyldyń qańtar-shilde ailarynda Almatydaǵy týristik infraqurylymǵa salynǵan investitsiia kólemi 92,2 mlrd teńgege jetken, dep habarlaidy Dalanews.kz.
Bul ótken jylmen salystyrǵanda 62%-ǵa artyq. Bul týraly qalanyń týrizm basqarmasy habarlady.
Qarajat jańa qonaq úi nysandaryn salýǵa, qoldanystaǵy infraqurylymdy jańǵyrtýǵa jáne qyzmet kórsetý sapasyn arttyrýǵa baǵyttaldy. Munyń bári Almatynyń halyqaralyq týristik arenadaǵy ornyn nyǵaita tústi.
Osy kezeńde týrizmnen túsken salyq túsimi 46,9 mlrd teńge boldy. Onyń ishinde qoǵamdyq tamaqtaný salasy – 21,2 mlrd teńge (45,2%), sport jáne demalysty uiymdastyrý – 8 mlrd teńge (17%), ýaqytsha ornalastyrý qyzmetinen 4,6 mlrd teńge (9,8%) túsken.
«Investitsiia men salyq túsiminiń ósýi Almatydaǵy týrizm salasynyń qalanyń ekonomikasyndaǵy negizgi qozǵaýshy kúshterdiń birine ainalyp kele jatqanyn kórsetedi. Bul qarajat infraqurylymdy damytýǵa, servisti jaqsartýǵa jáne zamanaýi sapa standarttaryn qalyptastyrýǵa múmkindik beredi», – dep atap ótti týrizm basqarmasynda.
Týrizmdi damytý qonaqtardyń Almatyǵa degen qyzyǵýshylyǵynyń artýyn ǵana emes, sondai-aq qalanyń júieli jumysyn da kórsetedi: bizneske jańa múmkindikter jasalyp, qyzmet túrleri keńeiip, zamanaýi standarttar engizilýde. Munyń bári Almatynyń óńirdegi basty týristik ortalyqtardyń biri retindegi mártebesin nyǵaitady.
