Almatyda "Tarifti investitsiiaǵa aiyrbastaý" baǵdarlamasy bastaldy. Baǵdarlama aiasynda tozyǵy jetken jeliler men infraqurylym jańarady. Bul týraly Óńirlik kommýnikatsiialar qyzmetiniń brifinginde Ulttyq ekonomika ministrligi Tabiǵi monopoliialardy retteý komitetiniń Almaty qalasy boiynsha departamentiniń basshysy Ásel Býdeneeva aitty, dep habarlaidy Dalanews.kz.
"Tariftiń ósýine investitsiialyq baǵdarlama bekitken taýar quny, sondai-aq ekonomikalyq qyzmet túri men ortasha ailyq nominalynyń ózgerýi áser etti", - dedi Ásel Býdeneeva.
Brifing barysynda Ásel Býdeneeva biyl ózgergen tarifterge de toqtaldy.
Ol:"Sýmen jabdyqtaý ortasha túsim-122,38 teńge/m3 (ósim 23%), halyq úshin – 98,97 teńge/m3 (ósim 82,53%). Sý burý ortasha túsim – 80,41 teńge/m3 (ósim 50,95%), halyq úshin – 80,03 teńge/m3 (ósim 173,78%). Jylý energiiasyn berý jáne jabdyqtaý ortasha tarif - 10 892,83 teńge/Gkal (ósim 12%), halyq úshin – 8 058,32 teńge/Gkal (ósim 12%). Ystyq sýmen jabdyqtaý jylytý kezeńinde – 575,09 teńge/m3 (ósim 10,5%), jylýaralyq kezeńde – 529,96 teńge/m3 (ósim 10,4%). "Alataý Jaryq Kompaniiasy" elektr qýatyn berý qyzmetiniń tarifi 8,87 teńgeden 11,4 teńge/kVt·saǵ deiin ulǵaidy (2,53 teńgege ósti). ShJQ "Almaty Sý" sýmen jabdyqtaýǵa ortasha eńbek tarifi 99,41 teńgeden 107,05 teńgege deiin (ósim 11,78 teńge), halyq úshin – 54,22 teńgeden 66,00 teńgege/m3 deiin ulǵaityldy" - dedi.
Qalanyń Energetika jáne sýmen jabdyqtaý basqarmasy basshysynyń orynbasary Nurbaqyt Serikbai, aldaǵy jyly Almatyda kem degende 104 km sýmen jabdyqtaý jelisin, 73 km sý burý jelisin, 39 km jylýmen jáne 120 km elektrmen jabdyqtaý jelisin jańartý josparlanyp otyrǵanyn aitty. Bul jyl saiyn sý jáne jylýmen jabdyqtaýdyń tozý deńgeiin 3%, al qalǵan injenerlik jelilerdi 1,2% tómendetýge múmkindik beretinin aitty.
"Búginde jóndeý jumystary qoldanystaǵy tarifpen júrgizilýde. Alaida aǵymdaǵy jóndeý shyǵyndary injenerlik jelilerdiń tozýy men apat deńgeiin tómendete almaidy", - dedi ol.
Almatyda injenerlik jeliler 50% tozǵan. Tariftiń ósýi jeliler men jabdyqtardy jańartýǵa múmkindik beredi, bul apatty azaityp, qyzmet sapasyn jaqsartady.
Búginde Almaty qalasynyń Ákimdigi halyqtyń áleýmettik osal toptaryna kommýnaldyq qyzmet tarifi óskeni úshin ótemaqy tóleýdi jalǵastyrady.
Qalanyń Jumyspen qamtý jáne áleýmettik baǵdarlamalar basqarmasynyń basshysy Baýyrjan Jaýbasov byltyr shildeden bastap qala ákiminiń bastamasymen 9 sanattaǵy azamattar úshin TKSh qyzmetiniń qymbattaýyna ótemaqy berilgenin aityp ótti. Bir jyl ishinde 5,7 mlrd teńge somasyna 140 myńnan astam azamat 0,8 AEK mólsherinde ai saiynǵy áleýmettik tólem alypty.
"Aldaǵy ýaqytta kommýnaldyq qyzmet baǵasynyń ósýine bailanysty qaladaǵy 9 sanatqa ótemaqy tóleý jalǵasady", - dedi B.Jaýbasov.
Búginde Almatyda joǵaryda atalǵan sanattarǵa jatatyn 332 885 azamat turady. Brifing barysynda spikerler BAQ ókilderiniń saýaldaryna jaýap berip, aldaǵy ýaqytta tariftiń ósýi jelilerdiń jańarýymen qatar saladaǵy qyzmet sapasynyń artýyna ákeletinin aitty.
