Almatynyń shetinde demalys kúnderi iri kommýnaldyq apat boldy. Túnde jylý qubyry jarylyp, qainaǵan sý jekemenshik sektorǵa jaiylǵan. Ystyq sý aýlalardy basyp, turǵyn úilerdiń ishine deiin kirgen, dep habarlaidy Dalanews.kz "KTK" telearnasyna siltep.
Saldarynan tórt adamdy kúiik shalǵan, olardyń úsheýi aýrýhanaǵa jatqyzylǵan. Qutqarý qyzmetiniń mamandary turǵyndardy evakýatsiialaǵan, óitkeni ǵimarattardyń qulaý qaýpi týyndaǵan. Sý irgetasty shaiyp, qabyrǵalarda jaryqtar paida bolǵan.
Turǵyndardyń aitýynsha, olar tún ishinde qatty shýdan oianǵan. Olar qarttar men balalardy qutqarý úshin ystyq sýdyń arasymen shyǵýǵa májbúr bolǵan. Keibiriniń aiaǵy kúiip qalǵan.
Jergilikti halyq mundai jaǵdai keiingi jyldary ekinshi ret qaitalanyp otyrǵanyn aitady. Olardyń sózinshe, 2020 jyly qubyrlar ishinara ǵana aýystyrylǵan, al tozyǵy jetken jeliler áli de isten shyǵyp jatyr.
"Almaty jylý jelileri" JShS málimetinshe, diametri 800 mm qubyr zaqymdanǵan. Apat oshaǵy oqshaýlanyp, jóndeý jumystary shamamen bes saǵatqa sozylǵan. Kompaniia ókilderi úilerdi aralap, kelgen shyǵyndy tirkegen. Qazir zalal kólemi baǵalanyp jatyr, keiin ótemaqy mólsheri anyqtalady.
Alaida turǵyndar apat qaitalanýynan qaýiptenip, 55 jyldan asa ýaqyt paidalanylǵan jylý jelilerin tolyq aýystyrýdy talap etip otyr.
