Almatyda úsh adamnyń ólimine sebep bolǵan avtobýs apatyna qatysty sot otyrysy ótip jatyr. Aiyptalýshy er adam sotta sońǵy sózin sóiledi, - dep habarlaidy Dalanews.kz.
Aiyptalýshy er adam 293-bap boiynsha buzaqylyq jasaǵanyn moiyndaitynyn aitty.
"Ashýǵa boi aldyryp, óreskel qate jiberdim. Buzaqylyq jasaǵanym úshin óte qatty ókinemin. Aldaǵy ýaqytta ózim úshin ómirlik sabaq aldym dep túsinemin. Endigi buzaqylyq jasamaimyn dep ózime senemin jáne sizderdiń de senýlerińizdi suraimyn", - deidi aiyptalýshy.
Sonymen qatar, sottalýshy aiyptaý aktinde jazylǵan derekpen kelispeitinin aitty.
"Bylai dep jazyp ketken eken: Óziniń narazylyǵyn júrgizýshige bildirip, buzaqylyq nietpen qoǵamdyq kólik ishinde qylmystyq oi týyndap, qoǵamdyq tártipti qurmettemeýi anyq kórinetin azamattarǵa kúsh qoldaný ne onyń qoldaný qaterin tóndirý men bótenniń múlkin joiýmen nemese búldirýmen nemese barynsha arsyzdyqpen erekshelenetin ádepsiz áreket jasaýmen ushtasqan asa qatygezdikpen buzý týraly óziniń qylmystyq piǵylyn júzege asyrý maqsatynda" dep asyra siltep jazyp ketipti. Anyqtaýshy Orazaevtyń bul jazǵandarymen múlde kelispeimin. Sebebi narkologiialyq dispanserdiń saraptamasy boiynsha, alkogol nemese esirtki zatyn qoldanǵanym anyqtalǵan joq jáne ondai nárselerge eshqashan áýestigim bolǵan emes. Aqyl-esim durys. Buryn psihikalyq esepte turǵan emespin. Bar oiym úige jetý bolǵan edi. Úige asyqtym", - deidi aiyptalýshy er adam.
Aiyptalýshy birneshe faktti eskerýdi surady.
"Buryn sońdy tártip buzýshylyq jáne qylmystyq jaýapkershilikke tartylǵan emespin. Jep júrgen nanymdy adal eńbekpen taýyp júrgen qarapaiym qurylysshymyn. Úsh ul balanyń ákesimin jáne asyraýshysymyn. Qurmetti sot myrza, osylardy eskere otyryp maǵan beriletin jaza minimal jáne jeńil bolǵanyn qalaimyn jáne ótinemin. Ádil sheshim qabyldaidy dep úmit artamyn", - deidi aiyptalýshy.
Sonymen qatar, aiyptalýshy er adam marqumdardyń otbasynan keshirim surap, shyn júrekten ókinetinin aitty.
