Almatyda jeke ınvestısıalardyń esebine salynǵan 103 tósek-oryndyq zamanaýı jataqhana ashyldy. Munda stýdentterge jaıly bólmeler, as bólmesi, oqýǵa jáne demalýǵa barlyq jaǵdaı jasalǵan. Sonymen qatar, ınternetpen (wi-fi) qamtamasyz etilgen kovorkıng aımaǵy da qarastyrylǵan, dep habarlaıdy Dalanews.kz.
"Jataqhana keremet! Bólmeleri keń ári jaryq, qajettiniń bári bar. Ashana da óte yńǵaıly, taǵamdary dámdi. Wifi jyldamdyǵy da tamasha, sabaq oqýǵa óte yńǵaıly", - dedi jataqhana turǵyny Erbol Baltabaev.
Almaty qalasy Jastar saıasaty basqarmasynyń málimetinshe, oqý jyly bastalǵanǵa deıin Almatyda 1920 oryndyq 6 jataqhana ashyldy, al jyl sońyna deıin Almaty qalasy ákimdiginiń jobalyq keńsesiniń qoldaýymen 3105 oryndyq 4 nysandy paıdalanýǵa berý josparlanyp otyr. 2024 jyly jalpy 5025 oryndyq 10 nysandy, 2025-2026 jyldary 34 295 oryndyq 33 nysandy paıdalanýǵa berý kózdelgen.
"Meniń jataqhanam óte yńǵaıly. Kovorkıng aımaǵy zamanaýı jabdyqtarmen qamtylǵan, sondyqtan sabaǵymdy oqyp, jobalarymdy jasaý úshin tamasha oryn. Jumys istep otyrǵan kezde basqa stýdenttermen qarym-qatynas jasap, tájirıbe almasýǵa da múmkindik bar. Sonymen qatar, jataqhanamnyń aıaldamaǵa jaqyn ornalasýy óte yńǵaıly. Kez kelgen baǵytqa bararda ýaqytty únemdep, qala ishinde erkin qozǵala alamyz", - dedi stýdent Ádilet Dosymbekov.
Esterińizge sala keteıik, jataqhana qurylysyn tıimdi úılestirý úshin stýdenttik jataqhanalar qurylysy boıynsha jobalyq keńse jumys istep tur. Jobalyq keńseniń negizgi mindeti Almaty qalasynda jataqhanalar qurylysy boıynsha memlekettik baǵdarlamany iske asyrý jáne stýdentterdi turǵyn úımen qamtamasyz etý úshin qolaıly jaǵdaı jasaý. Jobalyq keńse ashylǵannan bastap 120 áleýetti ınvestor júgindi, onyń 67-si qazir jumysqa kirisken, bul qoldaý mehanızminiń tartymdylyǵyn kórsetedi.
Aıta ketý kerek, Almaty ekonomıkasy turaqty ósýdi kórsetip otyr. Jarty jylda 715 mlrd teńge ınvestısıa tartyldy. Jyl basynan beri 32 myńnan astam jańa jumys orny quryldy. Almatynyń JÓÓ 2024 jyly 4,7% - ǵa ósti. Almatyda negizgi kapıtalǵa salynǵan ınvestısıalar kólemi 15,8% - ǵa ósti. "Almaty Business Development Company "Almaty qalasynyń bıznesti damytý kompanıasy" JSHS Almaty qalasynda ınvestısıalar tartý jáne ınvestorlardy súıemeldeý salasyndaǵy óńirlik uıym bolyp tabylady. Qoldanystaǵy zańnamaǵa sáıkes Kompanıa "bir tereze"qaǵıdaty boıynsha Almaty qalasynda ınvestısıalar tartý jáne ınvestorlardy súıemeldeý salasyndaǵy qyzmetti júzege asyrady. Kompanıa qala ekonomıkasynyń basym salalaryna ınvestısıalar tartady, qarjylandyrýdyń memlekettik jáne óńirlik baǵdarlamalary boıynsha konsýltasıalar beredi, sondaı-aq ınvestısıalyq jobalardy keshendi súıemeldeýdi júzege asyrady.
