Almaty oblysynda UBT-ny 9827 oqýshy tapsyrady
Oblystyq bilim basqarmasynyń basshysy L. Bazarqulova óńirde UBT erteń, iaǵni 20 maýsymda bastalyp, 25 maýsymǵa deiin jalǵasatynyn aitty.
L. Bazarqulovanyń habarlaýynsha, oblystaǵy 14268 túlektiń 9872-si UBT-ǵa kiredi. Erteń testileý óńirdiń 6 aýdanynda – Aqsý, Qarasai, Jambyl, Ile, Balqash, Talǵar aýdandary men Qapshaǵai qalasynda bastalady. Testileý pýnktterinde 142 aýditoriia daiyndalyp, 19-y rezervke ázirlengen. Túlekterdi tasymaldaý, jatyn orynmen, tamaqpen qamtamasyz etý qarastyrylǵan. Qazirgi kezde oblystyń barlyq aýdandary men qalalary testileýge tolyǵymen daiyn.
Ekinshi másele boiynsha oblystyq densaýlyq saqtaý basqarmasynyń basshysy Ashan Baidývaliev baiandama jasady. Oblysta MÁMS-ni engizýge baǵyttalǵan aqparattyq nasihat jumystaryna toqtala kele, óńirde atalmysh saqtandyrý isine 664 meditsinalyq uiym tartylǵanyn, onyń 659-y memlekettik, 5-eýi jekemenshik ekenin atap ótti. Dárigerler men meditsina mamandaryn oqytýmen qamtý 100% qurap otyr. Qazirgi kezde «Emhanaǵa tirkel de, óz mártebeńdi anyqta» atty aktsiia aiasynda turǵyndardyń turǵylyqty jeri boiynsha meditsinalyq uiymdarǵa bekitilý deńgeii 82%-ke jetken. Al 30 maýsymǵa deiin qamtý deńgeiin 100%-ǵa jetkizý josparlanǵan. Bul oraida mártebesin anyqtaý deńgeii – 99,9 %.
Oblys ákiminiń orynbasary Jaqsylyq Omar UBT asa mańyzdy belestiń biri bolǵandyqtan ony sapaly, durys ótkizýge bar kúsh-jigerdi jumsaý qajettigin atap ótti.
– Búgingi kúni bilim alý, bilimdi bolý – eń basty sharttardyń biri. Túlekterimizdiń joǵarǵy oqý oryndaryna túsip, sapaly bilim alǵany, myqty maman bolyp, qoǵamnyń damýyna úles qosqany – biz úshin asa mańyzdy másele. Bul rette UBT – bolashaqqa nyq qadam jasaýdyń bir kezeńi. Sondyqtan bul máseleni baqylaýda ustap, testileýge kirgen balalarǵa da, ata-analarǵa da qolaily jaǵdai jasaýǵa nazar aýdarýymyz kerek, – dedi J.Omar.
– MÁMS boiynsha aqparattyq-nasihat jumystarynyń nátijeleri jaman emes. Bul baǵyttaǵy jumysty osy qarqynmen jalǵastyryp, maýsym aiynyń sońyna deiin halyqtyń emhanalarǵa bekitilý deńgeiin 100 %-ǵa jetkizýimiz kerek. Sondyqtan shtabtardyń jumysyn jáne aqparattyq-nasihat jumystaryn belsendi túrde júrgizińizder, – dedi oblys ákiminiń orynbasary.
Almaty oblysy ákiminiń baspasóz qyzmeti
