Saltanatty jıynǵa qatysýshylardy quttyqtap, tilegin bildirgen J. Omar:
- Qurmetti áleýmettik sala qyzmetkerleri! Barshańyzdy oblys basshysynyń atynan kásibı merekelerińizben shyn júrekten quttyqtaımyn! Sizderdiń qarttar men múgedekterge, kóp balaly jáne kúnkórisi tómen otbasylarǵa, jumyssyz azamattarǵa kórsetken qamqorlyqtaryńyz erekshe atap ótýge turarlyq.
«Meıirim júrekten shyǵady, peıil tilekten týady» deıdi halyq danalyǵy. Osy salada jetken jetistikterdiń barlyǵy – izgilik pen adamgershilikti tý etken eseli eńbekterińizdiń jemisi.
Sizderdi merekelerińizben taǵy da quttyqtaı otyryp, denderińizge saýlyq, otbasylaryńyzǵa amandyq tileımin, - dedi oblys ákiminiń orynbasary.
Munan soń «Áleýmettik qorǵaý júıesiniń úzdik qyzmetkeri» oblystyq baıqaýynyń qorytyndysy shyǵarylyp, úzdikter marapattaldy. «Memlekettik áleýmettik saqtandyrý qory» AQ oblystyq fılıalynyń mamany Baýyrjan Qabdrahmanov «Áleýmettik saqtandyrý salasynyń úzdik qyzmetkeri» nomınasıasynyń jeńimpazy, oblystyq eńbek ınspeksıasy boıynsha basqarmasynyń bas mamany Raýshan Abdanbaeva «Eńbek ınspeksıasy salasynyń úzdik memlekettik eńbek ınspektory», Taldyqorǵan kalasynyń - úı jaǵdaıynda arnaýly áleýmettik qyzmet kórsetý bólimshesiniń áleýmettik qyzmetkeri Uljalǵas Kóketaeva «Úzdik áleýmettik qyzmetker», múmkindigi shekteýli balalarǵa arnalǵan «Úmit» kúndizgi bolý ortalyǵynyń áleýmettik qyzmetkeri Jibek Alkenova «Úzdik áleýmettik qyzmetker», «Báıterek» kúndizgi bolý ortalyǵy «Úzdik medısınalyq-áleýmettik mekeme» atanyp, 100 myńnan 300 myń teńgege deıingi aqshalaı syılyq sertıfıkattaryna ıe boldy.
Sonymen qatar jumyspen qamtýdy úılestirý jáne áleýmettik baǵdarlamalar máselesinde jaqsy kórsetkishterge jetken uıymdar da nazardan tys qalǵan joq. İle aýdandyq jáne Kóksý aýdandyq jumyspen qamtý ortalyqtarynyń árqaısysy 200 000 teńge sertıfıkatpen marapattalady.
Halyqty áleýmettik qoldaý máseleleri boıynsha «Áleýmettik jobalardy» iske asyrýda belsendilik tanytqany úshin «Erlik», «Sporttyq saýyqtyrý ortalyǵy» múgedekter qoǵamdyq birlestikteri, «Taldyqorǵan aımaqtyq eńbekke ornalastyrýǵa járdem kórsetý qory» qoǵamdyq qorynyń eńbegi erekshe atalyp, árqaısysyna 100 myń teńgeniń sertıfıkaty berildi.
Sol sıaqty oblys ákiminiń orynbasary birqatar azamattarǵa «Eńbek Eri» medalin, «Áleýmettik-eńbek salasynyń úzdigi» tósbelgisin, Eńbek jáne halyqty áleýmettik qorǵaý mınıstrliginiń, oblys ákiminiń qurmet gramotalary men alǵys hattaryn usyndy.
Jalpy búgingi kúni Almaty oblysynda áleýmettik qorǵaý salasynda 3 myńnan astam adam eńbek etedi. Memlekettik baǵdarlamalardy júzege asyrý nátıjesinde óńirdegi jumyssyzdyq deńgeıi 4,7 %-ke tómendedi. Bul kórsetkishke qol jetkizý úshin 2011 jyldan 2016 jylǵa deıin 126 myńnan astam jumys orny quryldy.
«Nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan baǵdarlamasyna» bıylǵy jyly oblysta 22 myń adam tartyldy, 8 myńnan astam jumyssyz azamat tegin kásibı bilim alýǵa múmkindik aldy. Sonymen qatar baǵdarlama sheńberinde bıylǵy jyldyń ózinde 800-ge tarta adamǵa jalpy somasy 3 mlrd. 563 mln. teńge shaǵyn nesıe berildi. Múgedekterge kómek retinde bıylǵy jyly 2 mlrd. 900 mln. teńge bólindi.
