Rinat Rifhatuly Zaitovtyń basshylyǵyndaǵy «Alataý» dástúrli óner teatry tól ónerimizdiń ornyn aishyqtai túsý, qanatyn keńge jaiý maqsatynda 2022 jyldyń 11-27 maýsym aralyǵynda «Ágýgai men Igigai» atty halyq ertegileri men dástúrli ánderden quralǵan balalarǵa arnalǵan mýzykalyq qoiylym (2022 – Balalar jyly aiasynda), «Altybaqan» oiyn-saýyq án keshi, «Ásem áýen men kórkem qimyl» atty sazdy bi keshi, aitysker aqyn Rinat Zaitovtyń «Men senderdi jaqsy kóremin, adamdar» atty mýzykalyq keshi, sondai-aq «Aiman-Sholpan» mýzykalyq komediiasymen (premera) Nur-Sultan, Pavlodar, Ekibastuz, Semei, Abai jáne Aiagózge gastróldik saparmen barýdy josparlaǵan bolatyn.
Bul sapardyń Teatr úshin tuńǵysh ret ekenin aita ketken jón. Teatrdyń kórkemdik jetekshisi – Juldyzbek Jumanbai.
Joǵaryda atalǵan qala, aýdandarda el-jurt qazaqy dástúrmen shashýlaryn shashyp, ystyq yqylaspen qarsy alyp jatty.
QR Mádeniet jáne sport vitse-ministri Nurqisa Dáýeshov, QR Parlamenti Májilisiniń depýtaty Erlan Sairov, Ekibastuz qalasynyń ákimi Ardaq Amangeldiuly, Aiagóz aýdanynyń ákimi Seiilbek Abuiyruly, «Jastar» teatrynyń direktory, Memlekettik syilyqtyń iegeri Ádil Ahmetov, M. Gorkii atyndaǵy memlekettik akademiialyq orys drama teatrynyń direktory Ernar Jumataev, «A. I.» teatrynyń direktory, QR Eńbek sińirgen qairatkeri, ánshi, aktrisa Aigúl Imanbaeva, Teatr jáne kino akteri, Qazaqstannyń eńbek sińirgen qairatkeri Dáýren Serǵazin, Aqyn Iranǵaiyp Kúzembaev jáne t.b. taptaýryndyqtan ada erekshe formaǵa qurylǵan teatr kórsetilimderine joǵary baǵalaryn berdi.
Sonymen qatar teatr ujymyna jyly lebizderin bildirip, alǵystaryn aitty. Batalaryn bergen úlkender de boldy.
«Eskide qazaqtyń dástúrinde aýylǵa sal-seriler, ónerpazdar kelgen kezde, bazar baiany bolatyn. Bazar ishinde habar jetkizetin. Biz de «Alataý» dástúrli óner teatrynyń atynan sol dástúrdi jańǵyrtý, úlgisin kórsetý maqsatynda bazarda boldyq», – deidi Rinat Zaitov.
Bazarlarda Rinat Zaitov arnaý aityp, Teatr ónerpazdary ánderin arnady. Qai bazarǵa barsa da, arty sýretke túsýmen jalǵasyp, kishigirim kontsert atmosferasy sezildi.
Sondai-aq Rinat Zaitov jáne teatr artisteri arnalar, BAQ-na suhbattaryn berdi.
Qýanysh Jumabekuly
«Alataý» dástúrli óner teatry Ádebiet bóliminiń meńgerýshisi
